Gjykata e Tiranës dënoi me 14 vite burg Artan Markun, i cili akuzohet për vrasjen e shtetasit Arben Kanina, ngjarje kjo e ndodhur në shkurt të këtij viti, në një nga ishgodinat i Institutit Bujqësor, në Kamëz. Gjatë seancës gjyqësore, i pandehuri ka pranuar autorësinë e krimit duke shpjeguar edhe rrethanat e ngjarjes.
Para togave të zeza, Marku ka treguar se e kishte qëlluar viktimën me sende të forta, pasi ai i kishte treguar se kishte ngacmuar seksualisht një vajzë 10-vjeçare. Duke pranuar fajësinë, autori i krimit të rëndë përfitoi nga gjykimi i shkurtuar, ku me 1/3 e uljes së dënimit, ai do të vuajë 9 vite e 4 muaj burgim.
Ngjarja në fjalë u shënua më datë 27 shkurt të këtij viti. Viktima dhe autori ishin miq me njëri-tjetrin dhe ndanin qiranë së bashku. Në atë kohë, të dy këta persona ndodheshin në gjendje të dehur. Këtë fakt e ka pohuar edhe vetë Artan Marku, i cili ka pohuar se të dy ishin nën efektin e alkoolit kur Kanina i tregoi se kishte ngacmuar seksualisht një vajzë të mitur. Ndërsa sherri mes tyre kishte nisur sepse, pasi Marku kishte dëgjuar historinë, e kishte quajtur mikun e tij “pedofil”.
Pikërisht për këtë fjalë kishte nisur edhe debati mes tyre deri në momentin që Marku kreu aktin e rëndë, duke e qëlluar Kaninën me sende të forta dhe me një shkelm në fyt. Ditën e ngjarjes, policia mori në pyetje edhe babain e vajzës për të cilën viktima pretendonte si e kishte ngacmuar seksualisht, por ai e kishte mohuar automatikisht diçka të tillë. Sipas babait të vajzës së mitur, kjo gjë është thënë nga autori për të justifikuar krimin që kishte kryer.
(Gazeta Shqiptare)