Gazeta Shqiptare Online

| Nr. 5293 Viti XVIII
ONLINE
aa|| Kerko:a   
|| Faqet e Gazetës
   EDITORIAL
   Faqe 2-3
   Faqe 4-5
   Faqe 6-7
   Faqe 8-9
   Faqe 10-11
   Faqe 12-13
   Faqe 14-15
   Faqe 16-17
   Faqe 18-19
   Faqe 20-21
   Faqe 22-23
   Faqe 24-25
   Faqe 26-27
   Faqe 28-29
   Faqe 30-31
   MILOSAO
   BLUETOOTH

|| Bluetooth në PDF
 
Shehu: Bashkėqeverisja PD-PS pas zgjedhjeve, jo tabu
» Dėrguar mė: 18/02/2013 - 06:42
Valentina Madani

Deputeti demokrat i qarkut të Dibrës, Sherefedin Shehu ka bindjen e plotë se më 23 qershor pa LSI-në, PD-ja do të marrë 75 mandate. Z.Shehu thotë për "Gazeta Shqiptare" se, PD-ja ka rritur kuotat, por duke mbështetur edhe vijimësinë e aleancës me LSI-në, që sipas tij, së bashku krijojnë një shumicë të konsoliduar, por jo atë absolute. Deputeti i PD-së gjykon se konsumimi i disa mandateve apo i disa posteve politike duhet të jetë kriter, me qëllim që të gjithë ata që i janë futur rrugës politike të kenë mundësi për të konkurruar. Sherefedin Shehu nuk e quan tabu, modelin gjerman në Shqipëri, bashkëqeverisjen PD-PS pas zgjedhjeve. Ai nuk e shikon si një mundësi, por shprehet Shehu në sistemet demokratike dhe në filozofinë politike të vetë PD-së, nuk ka tabu. Po ashtu z.Shehu mbështet çdo koalicion, përfshi edhe atë me FRD-në e Bamir Topit, ndërsa i kujton PD-së që para se të kërkojë ndryshimin e vendit, duhet t'i bëjë një transformim vetes. Sipas tij, ata që kanë shumë mandate duhet t'u lirojnë vendin të tjerëve, me qëllim që të shmangen pakënaqësitë brenda PD-së. Shehu ka bindjen se PD-ja ka një skalion të dytë, i cili më 23 qershor është i gatshëm për të qënë në skalionin e parë.

Z.Shehu, cilat arsye e bëjnë të mirëpritur në PD ish- kreun e saj, Eduart Selamin, pas një shkëputjeje të gjatë nga kjo parti?
Mendoj se Eduart Selami është i mirëpritur dhe ka dy arsye: ai ka qënë në krye të lëvizjes që krijoi PD-në dhe më tej ishte ish-kryetari i saj dhe jo vetëm nga ana formale. Ai ka qënë pjesë e PD-së, por ka kontribute, të cilat e bëjnë të mirëpritur. Por edhe qëndrimi i tij është shumë domethënës qoftë për z.Selami, qoftë dhe për PD-në, sepse kjo tregon që PD-ja është parti që pranon diversitetin, është parti që ka shkuar nëpërmjet uljeve dhe ngritjeve, të cilat e kanë konsoliduar dhe e kanë bërë një parti me të vërtetë demokratike. Pra, ky afrim defakto i z.Selami është shenja më e mirë e vlerësimit të asaj që ka arritur PD-ja dhe njëkohësisht e forcës dhe mundësisë që PD-ja të vazhdojë të jetë partia kryesore.
Z.Selami, e shikoni thjeshtë një deputet të ardhshëm në Kuvendin e Shqipërisë, apo sërish pjesë e lidershipit të saj?
Kthimin e Selamit e shikoj si kthim normal. Hapi i parë është futja në listat e deputetëve dhe ndoshta në ato lista, ku probabiliteti për të qënë deputet do të jetë i lartë. Pastaj këto janë çështje që varen më shumë nga Eduart Selami, sepse edhe rikthimi i tij natyrisht do të jetë një proces, ndaj hapi i parë do të jetë si deputet dhe më pas hapi i dytë do të jetë çështje e procedurave dhe e kontributit të tij personal.
Që do të thotë, një zonë e vështirë konkurrimi për të?
Unë e shikoj një deputet të mundshëm. Nuk mendoj se z.Selami duhet të vihet në një zonë ku të ndjehet në vështirësi. Përkundrazi, z.Selami mund të shihet edhe si një aset në këtë këndvështrim, sepse ka një rikthim pas një periudhe të gjatë dhe është rikthimi i një njeriu me kontribute në ditët dhe momentet e vështira të PD-së. Ndaj gjykoj se probabiliteti për të qënë Selami deputet është i lartë, për të mos thënë njëqind për qind i sigurt.
Në cilën zonë konkretisht?
Sa për zonën nuk mund të supozoj, sepse janë çështje që nuk varen prej meje dhe as nuk mund t'i ndikoj unë.
Si po e gjen fushata?
E veçanta e PD-së për mendimin tim është se duhet t'u thotë qytetarëve se është e aftë për të qeverisur dhe që di të transformojë Shqipërinë, por edhe vetveten.
Çfarë nënkupton të transformojë vetveten?
PD-ja u ka dëshmuar shqiptarëve se në radhë të parë është parti që i intereson vendi, është parti, e cila ka kontribuar për zhvillimin e tij, është partia që gjatë këtyre viteve të qeverisjes ka lënë gjurmë të mëdha dhe ka e çuar Shqipërinë shumë afër, qoftë nga pikëpamja politike, po ashtu edhe nga pikëpamja e zhvillimit ekonomik, e ka çuar afër me BE-në dhe vendet më të zhvilluara të botës. Po t'i shikojmë të dy këndvështrimet, pjesa politike natyrisht që ka pasur arritje, siç është anëtarësimi në NATO, liberalizimi i vizave, ndonëse mbahet peng, por përsa i përket pjesës së PD-së, Shqipëria do ta kishte marrë tashmë statusin e vendit kandidat për në BE. Përsa i përket pjesës tjetër, në këto vite është zbatuar një politikë e zhvillimit të biznesit, e cila ka mundësuar rritje të buxhetit në përmasa të imagjinuara me gjysmën e ngarkesës tatimore të krahasuar me 6 apo 7 vite më përpara. Janë bërë projektet, të cilat për shqiptarët kanë qënë ëndërr, flas për rrugët dhe ujësjellësa apo projekte të tjera të karakterit publik. Dhe ajo që është më e rëndësishmja, është klasifikimi i Shqipërisë tashmë nga vendet në tranzicion në një vend me të ardhura të mesme. Tashmë Shqipëria është në grupin e vendeve me të ardhme të mesme të lartë. Kështu që këto e bëjnë PD-në më të besueshme edhe me ato që do të angazhohet për mandatin e tretë. Natyrisht që qytetarët do ta vlerësojnë atë që ka bërë PD-ja, por unë them që PD-ja do t'u tregojë qytetarëve se është e gatshme të bëjë gjëra shumë më të rëndësishme se ato që janë bërë. Kjo është e lidhur me dy aspekte apo me dy mundësi, sepse është hedhur një bazë e mirë dhe është fituar një përvojë qoftë në hartimin e politikave fiskale, qoftë në përgatitjen e projekteve politike, qoftë në zbatimin e tyre, por njëkohësisht është edhe një parti që ka vitalitet, ka shumë energji, ka shumë forca. Në këtë kuptim unë mendoj se PD-ja ka edhe një brez tjetër, që ndoshta është i padukshëm, por që do të jetë në gjendje që të vazhdojë dhe të qeverisë në mandatin e tretë.
E kanë konsumuar PD-në 8 vitet në pushtet?
Përsa i përket konsumit, ky është më shumë fenomen perceptimi, por unë mendoj se PD-ja në vend që të konsumohet, i ka rritur kuotat e saj për atë që ka bërë. E them këtë sepse sot kemi një PS që thotë se do të bëjë shumë gjëra, por asnjëherë nuk thotë se si do t'i bëjë ato gjëra, ndërkohë që ne kemi qeverinë dhe PD-në që thotë: shikoni këto që kam bërë dhe të tilla do të bëj edhe në ardhmen. Kështu që është më e besueshme dhe në tërësi po të bëjmë një bilanc, PD-ja më shumë ka afruar sesa ka larguar nga vetja, sepse gjithmonë mund të ketë një kategori të "pakënaqur", por mendoj se është pjesa tjetër më e madhe e afruar tek PD-ja. Në tërësi e vet mendoj PD-ja është në kuotat më të larta krahasuar me vitet e mëparshme.
Nga vijnë pakënaqësitë brenda PD-së?
Pakënaqësitë janë të dy aspekteve. Aspekti i parë është perceptimi i partisë si vend ku mund të përfitosh. Aspekti i dytë është mospranimi i konkurrencës dhe mospranimi i lobimit dhe i mbështetjes që ke në parti, sepse në fund të fundit në sistemet e hapura po kështu edhe në partitë e hapura, natyrisht që ka konkurrencë, natyrisht që ka ambicie, ka objektiva dhe synime për të qënë në nivelet më larat politike. Por në fund të fundit ka mekanizma dhe mekanizmi kryesor është votimi politik dhe ai popullor kur vjen fjala për mandatet. Kështu që karriera politike duhet parë e dyanshme, duhet parë si kontribut personal, por edhe si vlerësim që bëhet nga ana e partisë dhe në momentin kur kjo karrierë ndërpritet ose nuk shkon lart, atëherë fillojnë dhe shfaqen dilemat. Ndaj unë më shumë i shikoj si probleme të individëve sesa si probleme të PD-së, sepse forca e kësaj partie, ashtu si e gjithë shoqërisë qëndron tek konkurrimi, qëndron tek zbatimi i rregullave dhe tek mirëkuptimi. Kjo, sepse qoftë në nivelet e larta drejtuese, qoftë në poste të rëndësishme publike, gjithmonë ka disa formula.
Cilat janë këto formula?
Në postet e larta nuk bëhet konkurs si në shërbimin civil, mirëpo ka një vlerësim të kontributeve, ka disa kalkulime politike dhe në këtë kuptim provohen kabinetet, provohen deputetët. Por mendoj se nga ana tjetër duhet të ketë edhe mirëkuptimin që edhe ata që janë në radhë të shpresojnë se duhet t'u vijë radha. Në këtë këndvështrim them se konsumimi i disa mandateve apo i disa posteve politike duhet të jetë kriter, me qëllim që të gjithë ata që i janë futur rrugës politike të kenë mundësi për të konkurruar.
Megjithatë, ne shohim të njëjtët ministra në dy mandate qeverisjeje, por sipas jush, a është normale pasi duket sikur pushtetin e kanë marrë një grup njerëzish dhe PD-së i kanë mbaruar vlerat?
Nuk mendoj se janë të njëjtët, kjo për shkak të koalicioneve. Megjithatë kemi ministra që kanë tetë vjet në postet e tyre, por them se është normale, pasi nuk ka shkaqe të arsyeshme për t'i larguar këta ministra. Në fund të fundit më e rëndësishme është puna se individi. Nëse ministria është e suksesshme, nëse ministri përkatës ka realizuar programin e PD-së dhe duket edhe në këndvështrimin se çfarë përfaqëson ministri, sepse këtu nuk bëhen emërime dhe konkurse si në shërbimin civil. Pra bëhen edhe kalkulime të tjera përveç faktit që ministri duhet të jetë i aftë dhe kompetent, të menaxhojë apo të udhëheqë më mirë ministrinë e vet. Kur flasim për ministër, nuk flasim për menaxher të zakonshëm, por flasim për udhëheqës. Kjo sepse struktura e menaxhimit është e rregulluar me shërbimin civil, është e përhershme dhe kriteri i parë është që ministrat që të garantojnë realizimin e programit të PD-së. Pas kësaj, ka edhe kalkulime të tjera që i bëjnë ata të jenë për më shumë se një mandat dhe ajo që i mbulon të gjitha është qeverisja e PD-së. Mendoj që ka patur ndryshime, sepse koalicionet kanë sjellë freski nëpër struktura dhe vetë nivelin më të lartë, që janë ministrat. Por ka patur dhe ministra siç thoni ju, por ata thelluan pozicionet ministrore. Edhe kjo është një eksperiencë që i ka bërë ata së pari të dëshmojnë se janë të aftë të meritojnë rolin e liderit apo udhëheqësit dhe së dyti, të garantojnë qeverisjen e mirë, që është qëllimi kryesor i force politike në pushtet.
Gjithsesi, a duhej të ndryshonte qeveria para zgjedhjeve të 23 qershorit, që mos të shkojë para elektoratit me të njëjtët emra të 4 viteve më parë?
Nuk mendoj se tani është momenti i përshtatshëm për ndërrim ministrash, por rezultatet në zgjedhje dhe kontributi tashmë edhe politik, apo si të thuash, verifikimi i reputacionit të ministrave në procesin e zgjedhjeve mund të jetë kriter për kabinetin e ri. Në këtë kuptim ata që do të verifikojnë mbështetjen e tyre të gjerë në procesin e zgjedhjeve, natyrisht që duhen konsideruar për kabinetin e ri.
A është shndërruar në kriter "bindja" ndaj kryetarit për të zënë një post të rëndësishëm në qeveri?
Jo, nuk është kriter bindja ndaj kryetarit, sepse kryetari mund të vazhdojë të jetë kryetar kur ka një qeverisje të mirë dhe kur ka ministra të mirë.
Sipas jush, në rast të një mandati të ri, PD-ja duhet të përfaqësohet me emra të rinj?
PD-ja ka një skalion të dytë, i cili është i gatshëm për të qënë në skalionin e parë. Por këta emra kanë qënë më afër dhe në krye të PD-së ndër vite dhe është krejt e natyrshme që ata që kanë në krye të partisë kur ajo nuk është në pushtet, do të jenë në krye të qeverisë edhe kur partia vjen në pushtet.
Cili duhet kriteri bazë që një demokrat të bëhet deputet më 23 qershor?
Mendoj se kriteri i parë duhet të jenë kontributet e secilit, të atyre që janë sot deputetë, por edhe të atyre që mund të vijnë. Kjo është jo vetëm ajo që them unë, por edhe ajo që ka provuar PD-ja, sepse nëse nuk transformon vetveten, nuk mund të provosh se mund të transformosh vendin. Qytetarët votojnë për të transformuar vendin. Në këtë kuptim, them se grupi aktual është mjaft i përzgjedhur dhe në tërësinë e vet unë do të thosha që politikisht ky grup ka funksionuar shumë mirë, pasi ka qënë një periudhë parlamentare shumë e mirë po të kemi parasysh politikën bllokuese të opozitës. Shumë herë kanë qënë në diskutim numrat minimalë për të bërë votime. Po kështu ka pasur raste që edhe për ligje të veçanta nuk ka qënë unik qëndrimi, por rezultati përfundimtar ka treguar që grupi i PD-së ka qënë i konsoliduar në tërësinë e vet, me ndonjë përjashtim. Ka funksionuar mirë në të dyja këndvështrimet, qoftë në sistemin parlamentar, por edhe në rolin ose përgjegjësinë që ata kanë marrë para zgjedhësve të tyre. Pra, kanë lobuar për zonat e veta, kanë punuar që të ketë investime në zonat e tyre elektorale, që të zgjidhen problemet e zonës. Por ashtu, siç e dha modelin në 2005-ën dhe më tej e thelloi në 2009-ën, PD-ja po të shikosh statistikat gjithmonë e ka rifreskuar grupin e vet politik, pavarësisht nga meritat siç po them dhe unë për grupin ekzistues. Ky është një proces normal për dy arsye: arsyeja e parë kryesore është se duhet të ndryshosh apo të ruash perceptimin tek publiku, sepse po nuk bëre ndryshime, natyrisht edhe publiku mund të të paragjykojë. E dyta, është se edhe atyre që janë në listat e pritjeve duhet t'u jepet shansi, pasi PD-ja nuk ka vetëm 140 njerëz të aftë, kështu dikush për shkak të numrit të gjatë të mandateve duhet të lirojë vendin për ata që kanë dhanë kontribute të vazhdueshme, por që nuk u është dhënë mundësia për të hyrë në listën e deputetëve të PD-së. Po kështu edhe të tjerë janë shquar për kontributin e vet në pozicionet e tyre qeverisëse ose në pozicionet drejtuese politike që kanë patur. Po kështu edhe ruajtja e një strukture moshore, futja e të rinjve është një garanci e PD-së si dhe raportet gra dhe burra. Kërkohet një rritje e përqindjes së grave dhe të gjithë këta faktorë e bëjnë të domosdoshëm freskimin, por njëkohësisht kërkojnë edhe mirëkuptimin, sepse aty del grupi tjetër i të pakënaqurve, që krijon debatin publik nëse duhen bërë ndryshime apo duhet ruajtur vazhdimësia. Ndaj gjetja e një mesatareje në tërësi është një domosdoshmëri, por përfundimisht pavarësisht nga kontributet, gjykoj se një pjesë e deputetëve ekzistues do të zëvendësohen nga prurjet e reja.
A varet fitorja e PD-së më 23 qershor nga LSI-ja?
Absolutisht jo, sepse koalicioni me LSI-në mendoj se ka qënë një koalicion i natyrshëm dhe siç e thashë, PD-ja ka patur kuotat në ngjitje. PD-ja ka dhënë prova përsa u përket aftësisë qeverisëse, kështu që këtë mandat ne si PD do të kemi numrin e mjaftueshëm të deputetëve për të qeverisur, por nuk përjashton vazhdimin e koalicionit me LSI-në në varësi të rrethanave dhe të rezultatit të zgjedhjeve. Kjo sepse PD-ja ka qënë e hapur, ka thithur brenda vetes ato parti apo ata individë që gjatë kohës kanë menduar dhe vepruar ndryshe nga lidershipi i PD-së, ndaj në këtë këndvështrim nuk ka paragjykim lidhur me aleancën apo raportet me LSI-në. Por nuk mendoj se aleanca me LSI-në është se PD-ja nuk e shikon veten si fituese.
Sa mandate synon PD-ja të marrë më 23 qershor?
Partia Demokratike mendon që në këto zgjedhje të marrë 75 mandate.
Me apo pa LSI-në?
Pa Lëvizjen Socialiste për Integrim.
…Ngjan disi e pabesueshme.
Duket e pabesueshme, por mendoj se kjo ka një bazë, për arsye se mandatet e vitit 2009, natyrisht që kishin disa efekte nga mungesa e besimit. Por mendoj se mandati i dytë e ka rritur kuotën e PD-së jo vetëm se realizoi projekte të rëndësishme publike, por se periudha e mandatit të dytë ka koinciduar me një krizë të madhe ekonomike dhe Shqipëria arriti ta kalojë me sukses krizën më të rëndë që ka pasur bota. Kjo e shoqëruar edhe forcimin e reputacionit politik, me arritjet në fusha politike. Përsa i përket procesit të integrimit në BE, e shikojnë atë si një parti që mund t'i çojë shqiptarët në Evropë. Në këtë këndvështrim unë shikoj që besimi tek PD-ja ka ardhur në rritje dhe ky supozim më bën mua që të shtoj disa mandate që u fituan në vitin 2009.
Po në rast të koalicionit me LSI-në, cila është llogaria e numrit të mandateve që ka bërë PD-ja?
Natyrisht që bashkë me LSI-në, kalkulimet janë të bëra, pasi kjo parti pret që të shtojë mandate dhe të bashkuar do të kenë një shumicë të konsoliduar, por asnjëherë shumicë absolute.
Është i mundshëm një koalicion me FRD-në e Bamir Topit?
PD-ja është partia më e hapur për koalicione dhe siç e patë, nuk ka tabu. Natyrisht që edhe partinë e z.Topi e shikon si parti shqiptare dhe koalicionet janë të mundshme dhe nuk besoj se ky do të jetë një koalicion parazgjedhor.
Po koalicion paszgjedhor me FRD-në?
Pas zgjedhjeve nuk besoj se PD-së i duhen vota dhe mandate.
E zëmë se i duhen votat e FRD-së për qeverisje?
Unë kam supozimin se nuk i duhen, pastaj koalicioni mund të jetë një çështje e negociueshme.
Kryeministri Sali Berisha në vitin 2009 deklaroi se për aleancën me LSI-në vendosi verdikti i shqiptarëve, por supozojmë sikur në 2013 shqiptarët do të votojnë në atë mënyrë sa të detyronin një bashkëqeverisje PD-PS, të ngjashëm me modelin gjerman, ju do ta mbështesnit, e shikoni si të mundshëm?
Nuk është tabu, por nuk e shikoj si mundësi, sepse tashmë pas 4 vitesh, shqiptarët ndoshta do të korrigjojnë diçka nga 2009, sepse në atë vit PD-ja pati arritje që nuk i kishte patur një qeveri gjatë gjithë këtij 20-vjeçari. Dhe në një vend ku njerëzit duhet të mendojnë më shumë për veten e tyre, PD-ja duhet të kishte marrë më shumë mandate se në 2009-ën. Në këtë këndvështrim, nuk e shikoj si një mundësi, por në sistemet demokratike dhe në filozofinë politike të vetë PD-së, nuk ka tabu. Nuk e shikoj të mundur, sepse kjo është në varësi të votuesve dhe nuk besoj që votuesit do ta çojnë situatën në këto raporte. Pra, unë kam kalkulimet e mia që të shkojmë në rritje të mandateve dhe jo në një situatë për të krijuar koalicion me PS-në.
PD-ja do të njohë çdo rezultat të zgjedhjeve?
PD-ja nuk hyn për të humbur dhe PD-ja ka pasur konseguencë politike. Natyrisht do të njohim çdo rezultat, por rezultatin e fituesit.
Printo Dėrgo me e-mail
 
 

Ndalohet rreptësisht prodhimi i faqes ose një pjese të saj pa kërkuar një leje të shkruar.
Copyright 2012 GAZETA SHQIPTARE
Përdorimi i lajmeve mund të bëhet duke përmendur burimin, nëse jo, kjo është një shkelje e të drejtave.