Juventus po kërkon të ndërtojë një ekip yjesh për të fituar “Champions League” sezonin e ardhshëm dhe për këtë arsye nuk ka ndërmend të ndalet në merkato.
Pas transferimit të Cristiano Ronaldos ‘zonja e vjetër’ sipas mediave italiane po synon një tjetër ‘yll’. Bëhet fjalë për mesfushorin e Lazio-s, Milinkovic-Savic.
Mesfushori serb ndiqet edhe nga Real Madrid, por presidenti i Lazio, Claudio Lotito, nuk ka ndërmend t’i ulë kërkesat e tij. Në fakt, ai kërkon 140/150 milionë euro për mesfushorin. Kështu, drejtuesit e bardhezinjve po punojnë për të bindur numrin një të bardhekaltërve që të ulë çmimin: Marotta dhe Paratici po ndërtojnë një plan për t’ia vjedhur lojtarin konkurrencës dhe për të bërë atë që bënë në 2016-ën me Higuain dhe Napoli-n.
Për ta realizuar këtë plan, ata janë të gatshëm t’i ofrojnë Lazio-s njërin mes Juan Cuadrado dhe Mario Manduzkic, kolumbiani pëlqehet shumë nga Simone Inzaghi dhe do të ishte funksional për lojën e kryeqytetasve, veçanërisht pas largimeve të Felipe Anderson dhe Nani.
Në sfond është Real Madrid, që duhet të bëjë blerje për të harruar sa më shpejt të jetë e mundur largimin e Cristiano Ronaldo. Objektivi kryesor është njëri mbes Mbappe dhe Neymar, por emrat më të mundshëm janë atë të Eden Hazard dhe Harry Kane. Por pjesë e listës së dëshirave të madrilenëve është edhe Sergej Milinkovic-Savic, për të cilin do të vihen në lëvizje pasi të jetë sqaruar e ardhmja e Marcelo, Bale dhe Benzema.
Pas një cikli të rëndësishëm fitoresh mund të prishet një lodër që dukej perfekte, por Florentino Perez është i gatshëm të kthehet në pistë. Kur ai vendosë të zbresë në fushën e merkatos, fishekzjarrët janë të garantuar.
(BalkanWeb)
