SHKODËR- Personat që shihni në foto janë Boran Bërçama, ish-polici në lirim dhe bashkëjetuesja e tij Silvana Ndoci 27-vjeç, të ekzekutuar mbrëmjen e djeshme në vendin e quajtur “Rruga e gjerë”, pranë pallatit ku jetonin me qira, në qytetin e Shkodrës.
Në foton e siguruar për “BalkanWeb” nga gazetari Senad Nikshiqi, dy të rinjtë shfaqen teksa pozojnë në krah të njëri-tjetrit.
Në momentin kur iu kanë zënë pritë dhe i kanë qëlluar me 20 plumba, ata të dy, bashkë me foshnjën 1 vjeç, kanë qënë duke u kthyer në banesë. Atentatorët, ende të paidentifikuar kanë pritur që Boran Bërçama të parkonte mjetin dhe kanë qëlluar me armë zjarri.
Nga të shtënat kanë mbetur të vdekur në vend burrë e grua, ndërsa fatmirësisht foshnja e tyre 1 vjeç ka shpëtuar dhe është gjetur nga fqinjët mëngjesin e sotëm.
Ajo që e bën më të rëndë gjithë ngjarjen është fakti se policia e Shkodrës ende nuk ka shpallur në kërkim asnjë të dyshuar për ngjarjen, motivet e së cilës mbeten mister.
Paraprakisht dyshohet se vrasja mund të ketë ndodhur për shkak të detyrës kur Bërçama shërbente në Policinë e Shtetit. Boran Bërçama, rreth 30 vjeç, ka punuar në Komisariatin e Shkodrës si Inspektor Krimesh, e më pas u bë Inspektor Rendi, por pas një mungese të pajustifikuar ai dha dorëheqjen në fund të vitit 2016.
(m.a/BalkanWeb)