TIRANE- Komisioni i Pavarur i Kualifikimit ka shkarkuar nga detyra gjyqtarin e Gjykatës Kushtetuese Gani Dizdari, pasi gjatë procesit të verifikimit në kuadër të vettingut, rezultoi me probleme sa i takon pasurisë dhe integritetit të figurës.

Për vlerësimin e anëtarit të Gjykatës Kushtetuese, KPK-ja u bazua në dy kritere: atë të figurës dhe pastërtisë të figurës.

Trupa gjykuese vlerësoi se gjyqtari Dizdari ka kontakte të papërshtatshme dhe probleme me pasurinë. E para ka të bëjë me nipin e tij A.L., i dënuar vite më parë për “ushtrim të ndikimit të paligjshëm te personat që ushtrojnë funksione publike”.

Bëhet fjalë për një rast të vitit 2012, ku ai, së bashku me persona të tjerë, po ushtronin ndikim në një trupë gjykuese në Gjykatën e Lartë që të lirohej një i dënuar me 20 vjet burg për vrasje.

Sipas KPK-së, gjyqtari Dizdari ka udhëtuar disa herë jashtë vendit me automjetin e nipit të tij, bazuar në të dhënat e sistemit TIMS.

Po kështu, problem për KPK-në është edhe pasuria e gjyqtarit.

(BalkanWeb)