Bardhezinjtë e Juventusit kanë arritur të sigurojnë fitoren e 6 radhazi në Serinë A teksa kanë mposhtur sot në mbrëmje Empolin me rezultatin 2-0.
Të zotët e shtëpisë nuk e vendosën për asnjë moment në dyshim suksesin teksa e dominuan totalisht lojën. Golat e takimit erdhën të dy në pjesën e dytë, me portierin Skorupski që shënoi autogol në minutën e 52-të dhe Aleks Sandron që vulosi fitoren në minutën e 65-të.
Mbrojtësi shqiptar i Empolit, Frederik Veseli, u aktivizua në lojë në minutën e 70. Pas këtij takimi, Juventusi ngjitet në kuotën e 66 pikëve, duke mbajtur kreun e renditjes me 10 pikë diferencë nga Roma e vendit të dytë që ka një ndeshje të zhvilluar më pak.
(BalkanWeb)