NGA SONILA MUSAJ

TIRANE- Alfred Qefalia i akuzuar për vrasje të mbetur në tentativë ka folur për “Gazeta Shqiptare” në lidhje me akuzat që ka ngritur i penduari i drejtësisë Kristi Pine, i dyshuar si pjesëtar i një grupi kriminal që kryente vrasje me pagesë. Para dy javësh, Kristi Pine, sapo ka hyrë në sallën e gjyqit u ndal drejt kafazit ku qëndronin të pandehurit Alfred Qefaliaj, Dritan Peksani dhe Klajdi Shermadhi dhe u drejtua me fjalët “Përse më shikon, ke një muaj që po më spiunon” dhe ka ofenduar në drejtim të tyre. Asnjë nga të pandehurit nuk reagoi për faktin se askush nuk e kuptoi se kujt ju drejtua Kristi Pine me këto fjalë.

Alfred Qefalia ka deklaruar se nuk ka lidhje me akuzat që pretendon Pine dhe se ai ka fakte për këtë. Qefalia ka shtuar se drejtues të lartë të policisë e kanë kërcënuar, ndërsa tha se ai është dhunuar dhe për vepra që s’ka pasur lidhje.

“Më kanë thyer brinjët dhe do i kërkoj gjykatës të më rregullojë brinjët se më kanë rrahur dhe më kanë degjeneruar nuk mund të fle gjumë”, ka deklaruar ndër të tjera Qefaliaj.

Para dy javësh sapo ka hyrë në sallën e gjyqit Kristi Pine dhe u drejtua nga kafazi ku ishit ju, Dritan Peksani dhe Klajdi Shermadhi dhe ju ofendoi me pretendimin se e keni spiunuar, keni një ide se cilit ju drejtua?
Nuk e di fare, madje nuk e kuptova as unë as të tjerët se çfarë tha. Po pyesnim njëri-tjetrin se nuk kuptuam asgjë. Ai nuk është mirë ka futur 20 veta në burg dhe thotë që më përgjoni. Ai mund ti drejtohet gjithkujt. Po ta shohësh edhe tek letrat që unë kam këtu ai e ka të shkruar e ka deklaruar vetë se ka pirë ilaçe ose kokrra.

Ju e njihnit më parë Kristi Pinen?
Jo jo, hera e parë që unë e kam parë atë ka qenë në gjykatë, nuk e kam njohur më parë.

Kristi Pine ka deklaruar se ju njiheshit dhe se jeni prezantuar nëpërmjet Admir Tafilit?
Po jam në dijeni se e ka përmendur emrin tim në prokurori. Unë e kam njohur në gjykatë dhe të gjitha ato akuza që i kanë publikuar edhe mediat nuk janë të vërteta. Unë kam fakte dhe prova fatmirësisht për ti faktuar.

Çfarë faktesh keni?
Ambienti ku unë jam arrestuar ka pasur kamera dhe gjatë orareve që ai më akuzonte për ato vepra janë vërtetuar pasi janë marrë serverat e kamerave dhe nga kamerat është vërtetuar që unë nuk kam qenë aty duke shpëtuar nga veprat e tjera. Ai ka gënjyer shumë.

Ju akuzoheni për veprën penale të vrasjes e mbetur në tentativë?
Unë akuzohem për dhënie ndihme në një plagosje.

Ndaj kujt?
Ndaj Edmond Çakmashit, kjo është e vetmja akuzë. Po këto dërdëllisin gjithë ditën, kjo është e vetmja akuzë vrasje e mbetur në tentativë, por s’e kam bërë unë dhe pse ai ka deklaruar se e kam bërë unë. Por të gjitha do ti shpjegoj me letra. Këta thanë për mua se më kanë kapur për bombën që iu vu babait të Sajmir Tahirit, por fati im i mirë kanë qenë kamerat që vërtetonin të kundërtën.

Kush i ka lëshuar këto akuza?
Kristi Pine, por nuk kam lidhje me akuzat që ai ka lëshuar ndaj meje. Vetëm për akuzën e plagosjes prokuroria më akuzon pasi për të tjerat është e faktuar nga kamerat. Mua më kanë vënë gjithë këto akuza pa fakte e pa prova. Unë kam pasur presion të tepërt nga drejtues të lartë të policisë së shtetit që do të vrasim familjen.

E di ti se kush janë këto drejtues që të kanë kërcënuar?
Normal që të gjithë, (përmend emrat) kanë qenë shumë policë rreth 50 policë tek koka dhe më kanë bërë tortura.

Çfarë presionesh keni pasur konkretisht?
Më kanë torturuar, më kanë degjeneruar, nëse i ke parë dhe fotot unë nuk njihem nga fotot më shtrembëruan nga dhuna dhe brinjët i kam të thyera nga torturat e nuk mund të fle gjumë. Seancën në vazhdim do i kërkoj gjykatës të më rregullojë brinjën që më kanë thyer, nuk di si ta shpjegoj se çfarë të rrahur më kanë bërë. Shpresoj që gjykata të ma miratojnë kërkesën. Më kanë rrahur kot më kanë rrahur për bombën që iu vu babait të Saimir Tahirit që aty nga kamerat kuptohet qartë që unë nuk kam lidhje.

(el.sp/Gazeta Shqiptare/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: