Analisti Andi Bushati ka kthyer vëmendjen nga debati i fundit publik në lidhje me marrëveshjen e 18 majit Rama-Basha që në thelb kishte garantimin e zgjedhjeve të lira dhe të ndershme.

Sipas Bushatit, Rama nuk e shkeli marrëveshjen, duke e quajtur gënjeshtar Bashën, sepse që në momentin që mbylli çadrën dhe vendosi të puthet me Ramën, oligarkët i kishin paguar paratë, mediat e kishin kryer procesin e lavazhit të trurit, krimi i kishte marrë masat me kohë. Bushati thotë se në këtë pikë as Ramës nuk i mbetej gjë për të rrëmbyer, as Bashës për të ruajtur.

Nga Andi Bushati
Një debat absurd i ditëve të fundit ka përfshirë Ramën dhe Bashën lidhur me vazhdimësinë ose jo të marrëveshjes që të dy nënshkruan fshehtas në natën e 18 majit. Pas propozimit të fundit të opozitës për të nxituar që tani drejt një reforme zgjedhore, kryeministri u përgjigj se ajo do të bëhet në kuadrin e paktit që ai firmosi me kreun e PD.

Ndërsa Basha i pyetur këtë të martë nga gazetarët, i konsideroi këto deklarata si cirk, duke këmbëngulur se marrveshja vdiq, pasi Rama vodhi dhe rrëmbeu vota.

Në fakt, pavarësisht nga retorika e palëve politike (Sot Ramës i intereson si lideri kuqezi i të gjithë shqiptarëve të pretendojë një pakt permanent me pakicën, ndërsa Basha i vënë në pozicionin e fëmijës që e gënjyen do ta varrosë këtë kapitull) pyetjet e ngritura mbeten: A ka vdekur pakti i 18 majit? A e prishi Rama marrëveshjen? A e shpërdoroi ai besimin që i’u dha?

Po të dëgjosh se ç’thotë sot Basha mbi këto pyetje, nuk ka më asnjë dilemë. Sipas tij thelbi i kompromisit të tyre ishin zgjedhjet e lira dhe të ndershme. Dhe deri sa këto nuk u realizuan, pasi Rama bleu dhe dhunoi votën e shqiptarëve, tani është e kotë të flasësh për një zgjatim të 18 majit.

Fatkeqësisht Basha gënjen. Deri më tani, as ai dhe as PD, nuk kanë dhënë asnjë provë bindëse se në 25 qershor, u bë gjëma. Basha kishte të gjitha ministritë, drejtoritë dhe garancitë që kërkoi dhe sot ai nuk mund të thotë asnjë gjysmë fjale.

Natyrisht, kjo nuk do të thotë aspak se zgjedhjet në Shqipëri ishin korrekte.
Paradoksi është se në momentin kur Basha vendosi të mbyllë çadrën dhe të puthet me Ramën, historia e tyre kishte përfunduar. Oligarkët i kishin paguar paratë, mediat e kishin kryer procesin e lavazhit të trurit, krimi i kishte marrë masat me kohë. Në këtë pikë as Ramës nuk i mbetej gjë për të rrëmbyer, as Bashës për të ruajtur.

Ishte pikërisht ky kalkulim i gabuar, që i dha mundësinë kryeministrit të vriste me të njëjtin gur të dy zogjtë: edhe të fuste zgjedhjet në xhep, dhe të respektonte atë për të cilën u angazhua.

Ndaj ne sot nuk kemi asnjë provë (e mbani mend opozitën memece të 25 qershorit që nuk bëri asnjë deklaratë për parregullsi?) se Rama nuk i ka qëndruar korrekt paktit që nënshkroi. Avantazhi i tij qe se gjeti një partner që e joshi me disa ministra fallco dhe me disa drejtori me lekë dhe arriti ta fusë në zgjedhje. Ai garën e fitoi aty. Pastaj 25 qershori qe thjesht një formalitet që i dha alibinë e kriminelit që nuk gjendet në vendin e krimit.

Prandaj, Basha sot nuk mund të përdorë vjedhen e zgjdhjeve si shkak për prishjen e paktit, se ai e pranoi atë, i ndërgjegjshëm për çfarë do të ndodhte më pas.

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb