TIRANE- Ergys Kolaveri ka mohuar sot akuzën si autor i atentatit me snajper në burgun e Vaqarrit ku mbeti i plagosur një i dënuar kosovar. Në një lidhje direkte për emisionin ‘Me Zemër të hapur” në ‘News24’ Kolaveri tha se nuk ka lidhje me atentatin e dështuar ndaj të dënuarit Gazmir Daci, ku i plagosur ngeli Lili Dulaj, pasditen e 30 korrikut 2016 në burgun e Vaqarrit dhe për këtë pretendoi se ka edhe prova.

Ergys Kolaveri tha se atë ditë ishte në Institut në kafe dhe nuk e di ku bie burgu i Vaqarrit. Po ashtu, ai theksoi se policia nuk i kishte gjetur as barut në duar kur është shoqëruar.

“Kam qenë në Institut në kafe më pas kam shkuar në shtëpi. Janë edhe filmimet. Është një person që i ka planifikuar këto gjera, unë nuk e di ku bie burgu i Vaqarrit. Nëse më gjeni një foto nga burgu në atë datë do mbaj unë përgjegjësi”- tha Kolaveri.

Sipas hetimeve të policisë, në shënjestër të vrasjes ka qenë Gazmir Daci, i dënuar për vrasjen e Valmir Kolaverit dhe plagosjen e rëndë të vëllait të tij, Robert Kolaveri, i cili aktualisht është i paralizuar. Ndërkohë për atentatin ndaj Dacit në pranga ka përfunduar Ergys Kolaveri, 25 vjeç, dhe Enea Ceka, 24 vjeç, kushëri i vëllezërve, që dyshohen se e kryen aktin në shenjë hakmarrjeje.

‘BalkanWeb’ ka zbardhur intervistën e plotë të realizuar sot me Ergys Kolaverin, i cili telefononi në emisionin “Me zemër të hapur” nga ambientet e paraburgimit.

INTERVISTA
A ke qenë në dijeni të një konflikti të mundshëm që mund të ketë pasur në Francë, Gazmir Daci me vëllain tënd?
I kemi rregulluar gjërat. I kemi shkuar me shokë atij në shtëpi. Kemi folur me babain e vet. Ky më ka shtyrë. Në atë moment i jam kundërpërgjigjur. I thash ‘erdha si njeri. Mua s’më shtyn dot’. Më pas të nesërmen ka lindur sherri, ka shkuar vëllai për t’u sqaruar.

Ju ka gjetur policia barut në duar?
Jo, nuk bëhet fjalë. Në orën 12:00 të natës më kanë marrë tek shtëpia. Më kanë pyetur nëse kisha makina apo jo. Unë deklarova ato që kisha. Kam qenë tërë kohës me babain tim në një biznes që kemi me vëllezërit. Policia ka shkuar ka marrë edhe punonjësin gjatë natës në orën 01:00.

Juve ju kanë gjetur dhe një dylbi në makinë…
Dylbi ka çdokush. Ato ishin të prishura. A e vrava me dylbi njeriun?! Jo. Njeriu nuk vritet me dylbi.

E njihni Lili Dulajn?
Unë nuk e njoh Lili Dulajn. Atë person se kam parë asnjëherë. Flas me fakte dhe jo pa fakte. Këto njerëz që flasin me fjalë, unë shkoj pas fakteve.
(d.d/ed.me/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb