Kryetari i Partisë Demokratike në një konferencë për shtyp ditën e sotme, ka zbuluar se kryebashkiaku i Durrësit Vangjush Dako është nën hetim pasi ekzistojnë përgjime të tij dhe kriminelëve që u ofron tendera në këmbim të votave në zgjedhjet e 25-qershorit.
Basha tha se për të mbrojtur Dakon, Rama largoi prokurorin Anton Martini që po merrej me çështjen duke e dërguar atë në Shkodër “me shpresën për të shpëtuar Gjushin nga prangat”.
Kreu i PD i kërkoi prokurorit të përgjithshëm të hetojë nëse lëvizja e Martinit është bërë nën presionin e Edi Ramës
“Me grupet kriminale, shit-blerja e votave u konfirmua nga raporti i OSBE-ODIHR. PD e ka ngritur me forcë problemin se Rama ka përdorur bandat e drogës në çdo qytet.
Vangjush Dako është kapur duke bashkëpunuar me grupet kriminale më të rrezikshme të Durrësit ku i kërkon të blejnë votat. Shërbimet inteligjente e kanë kapur gafil Dakon . Ai ju premton tendera kriminelëve, janë miliona euro, që ata të siguronin vota për PS. Këto pazare janë nën hetim nga Prokuroria e Krimeve të Rënda. Këtë e di Gjushi dhe mentori i tij Edi Rama. Ata ndërhynë për të larguar prokurorin që u mor me këtë çështje. Kjo është një nga çështjet, e dorëheqjes së shefit të SHISH.
Rama është hedhur në sulm për të mbrojtur Gjushin dhe të tjerët. Largoi prokurorin Anton Martini dhe e dërgoi në Shkodër. Prokurori largohet me ngritje në Shkodër, me shpresën për të shpëtuar Gjushin nga prangat.
I kërkoj prokurorit të përgjithshëm të hetojë nëse lëvizja e Martinit është bërë nën presionin e Edi Ramës. Ka prova për kriminalizimin e qeverisë shqiptare. PD do të çmontojë lidhjet e Ramës me krimin. Shqiptarët e panë me zë e figurë si Rama mbrojti Tahirin nga akuzat e antimafies italiane.
PD është e vendosur në betejën e saj për largimin e Ramës dhe krijimin e një qeveri anti-mafia. Shqiptarët do përfundojnë nga krimi i bërë njësh me politikën. PD do japë mbështetjen që Dako të japë përgjigje për bashkëpunimin me kriminelët. Prokurorët i kanë këto fakte. Prokurorët kanë tabulatet ku Gjushi i premton tenderat në këmbim të votës. Peshqit e mëdhenj kanë rënë në rrjetë” tha Basha.
(e.f/BalkanWeb)
