Sipas gazetës “The Guardian” të Londrës, qeveria konservatore
Qeveria britanike po e shqyrton seriozisht mundësinë e krijimit të një burgu të veçantë për grumbullimin e gjithë xhihadistëve britanikë të dënuar nga gjykatat për akte terroriste.
Sipas ‘The Guardian’, burgu i cilësuar si “alkatrazi britanik”, ka alarmuar shefat e burgjeve, të cilët janë të shqetësuar se një grumbullim i tillë i terroristëve islamikë, jo vetëm do krijonte një pikë fokusimi për protestat e publikut dhe do përngjante si një Guantanamo e dytë, por do t’u krijonte xhihadistëve mundësinë e vetorganizimit në “komanda operacionale dhe struktura kontrolli”, çka nuk kanë mundur ta bëjnë në gjendje të lirë.
Ekzistenca e burgut “Maze” në Irlandën e Veriut, në vitet 80, ku të burgosurit republikanë dhe lojalist u vetorganizuan në formacione ushtarake dhe drejtonin blloqet respektive në atë burg, po citohet si argumenti kryesor kundër këtij plani.
Gjatë 50 viteve të fundit, Britania i ka shpërndarë të burgosurit e rrezikshëm nëpër burgje të ndryshme, por qeveria kërkon të shmangë radikalizmin e të dënuarve të tjerë nga afro 130 xhihadistët që ndodhen aktualisht në burgjet britanike.
Një praktikë të tillë për grumbullimin e xhihadistëve e ka aplikuar Franca që përpara një viti, duke ndarë ekstremistët e ardhur nga Siria dhe Iraku, duke zbatuar programin në disa burgje të Parisit, pas sulmeve në redaksinë e revistës satirike “Charlie Hebdo”.
