TIRANE- Pavarësisht debatit që ka shpërthyer ditët e fundit nëse duhet të shembet godina ekzistuese e Teatrit Kombëtar, debat i cili ndan edhe vetë artistët, ku më fanatikët thonë se ajo godinë do shembet kur të kalohet mbi trupat e tyre, po ju sjellim disa foto që tregojnë gjendjen e brendshme të godinës, dyshemetë e çara, tuba e kabllo elektrik të zhveshur, madje edhe çatia e mbuluar me llamarinë.
E ndërsa debatet dhe konsultimet mes artistëve dhe Ministrisë së Kulturës vijojnë, nevoja për një Teatër të Ri Kombëtar bëhet gjithnjë e më prezente. Godina ekzistuese, e ndërtuar që para Luftës së Dytë Botërore, pothuajse është rrënuar dhe nuk ofron as kushtet minimale si për aktorët ashtu edhe për spektatorët.
Kujtdo që i ka rastisur të zgjedhë dimrin për të parë një shfaqje, me siguri ju thotë se i ftohti e errësira mbizotëronin në atë skenë më shumë sa vetë shfaqja.
Aq kohë sa spektatori ka mundësi të shohë vetëm fasadën, ne po ju sjellim disa foto të ambienteve të brendshme të Teatrit Kombëtar që tregojnë situatën e rëndë dhe gati të rrezikshme, për artistët dhe stafin që punon aty çdo ditë.
(m.a/BalkanWeb)