TIRANË- Një ditë pas ngjarjes tragjike në Krujë, ku një autobus me besimtarë dhe priftërinj ortodoksë u shkrumbua duke sjellë vdekjen e një 65-vjeçareje dhe plagosjen e 11 grave të tjera, policia ka arrestuar shoferin e autobusit.
Sipas të dhënave zyrtare është ndaluar shtetasi Skënder Jonuzaj, 56 vjeç, i cili drejtonte autobusin me targa AA584MP që mori flakë dhe u dogj plotësisht ndërsa ishte në ecje.
Në autobus ndodheshin 30 pasagjerë, pjesa më e madhe e tyre gra që ishin nisur për një ekskursion në Krujë fillimisht, Shkodër e Ulqin, por që përfundoi tragjikisht.
MJEKËT
Nga ana tjetër mjekët e repartit të Djegie-Plastikës në QSUT flasin për gjendjen e pacientëve, disa prej të cilave kishin djegie në mbi 50 % të trupit.
Mjekët thanë se gjendja e 11 pacienteve që janë në trajtim aktualisht është stabël, gjithsesi një mendim më i qartë do të bëhet i ditur pas konsultave. “Parametrat shëndetësorë të pacientëve janë stabël”, shprehen ata.
(m.k/BalkanWeb)