Presidenti i Filipineve Rodrigo Duterte është shprehur se CIA dhe Shtetet e Bashkuara të Amerikës duhet të fajësohen nëse ai pëson një vdekje të papritur.
“Nëse vdes, prapa kësaj do të fshihet Amerika, ose CIA,” u tha Duterte gazetarëve në një konferencë për shtyp.
Ai prej kohësh fajëson shërbimin inteligjent me bazë në Virxhinia për kritikat që i bën qeverisjes së tij për luftën e përgjakshme ndaj drogës.
“CIA, boll u kruajtët me mua. Një ditë, do t’ju përzë nga këtu. Ju ose do të duhet të më vrisni ose shporruni nga vendi im. E keni vetë në dorë,” tha Presidenti.
Kjo nuk është hera e parë që Duterte ka fajësuar CIA-n. Në shtator të vitit të kaluar, ai tha se ka marrë njoftime se CIA e do të vdekur, dhe se shumica e ambasadorëve amerikanë janë pjesë e këtij grupi.
Ai shprehet se CIA ka ndërhyrë në punët e shtetit të Filipines që në kohën kur shërbimi inteligjent u themelua në fillim të viteve ’60.
(e.f/BalkanWeb)