Napoli priti në “San Paulo” Juventusin në një nga ato sfida ku tre pikët nuk janë i vetmi angazhim, por mbi të gjitha mposhtja e një kundërshtari të përbetuar është ajo që do lumturojë tifozërinë që aq më shumë është e revoltuar me ndeshjet e mëparshme ku pretendohet se bardhezijntë janë favorizuar nga arbitri.
Për këtë arsye stadiumi ishte në kapacitet maksimal me 60 mijë bileta të shitura.
Tifozët e Napolit që njihen për dashurinë e pashtershme dhe mbështetjen e pakufizuar ndaj skuadrës, prisnin në shtëpi edhe “tradhëtarin” Higuain që në verë la “San Paulon” për Juventusin. Sigurisht që mikpritja as mund të mendohej, por për fatin e keq të argjentinasit sfida e mbrëmshme ishte për t’u harruar. Një nga statistikat në përfundim të ndeshjes pohonte se numri 9-të i bardhezijnve nuk e kishte prekur asnjëherë topin brenda zonës së portës të mbrojtur nga Reina.
Kaq i ka mjaftuar modeles kroate Nina Moriç për të thumbuar argjentinasin, raporton “Tuttosport”.
“Luajmë së bashku në muajin e 7-të të shtatzënisë…”, ka shkruar me ironi bukuroshja në një status ku vendos theksin te shëndeti i tepërt i sulmuesit argjentinas.
(e.k/BalkanWeb)
