TIRANE- Gjykata e Tiranës ka dënuar me 10 vjet burg një 50-­vjeçare të akuzuar për mashtrim me pasoja të rënda ndaj dy personave, njëri prej të cilëve, kunati i saj. Sipas Gjykatës, e pandehura Esmeralda H., duke u hequr si punonjëse në Kryeministri, u ka premtuar dy të dëmtuarve se do t’u blinte automjete luksoze “Mercedes Benz” me çmim të arsyeshëm.

Me pretendimin se automjetet ishin nxjerrë në ankand nga rezervat e shtetit, e pandehura i ka marrë një shumë prej 5500 euro shtetasit A.Xh. në 2014 dhe 6500 euro kunatit të saj S.J., në vitin 2012. Këtij të fundit, ajo i ka marrë dhe një shumë tjetër parash prej gati 18 mijë eurosh, duke i premtuar se do t’i jepte në këmbim një shtëpi te Libri Universitar. Këtë shumë ajo ka pretenduar se i duhej për të dëmshpërblyer një llogaritje të gabuar që kishte bërë në Kryeministri, gabim që ishte zbuluar nga një shoqëri auditimi amerikane.

Sipas Gjykatës, nga shqyrtimi i provave rezultoi e provuar se e pandehura Esmeralda H., me anë të gënjeshtrës dhe shpërdorimit të besimit, ka mashtruar dy shtetasin që e kallëzuan atë. Gjatë gjykimit
ka rezultuar se e pandehura Esmeralda nuk ka qenë punonjëse e Kryeministrisë për periudhën janar 2012­ dhjetor 2014. Gjatë gjykimit, e pandehura është shprehur e habitur pse ndodhej në bankën e të akuzuarve. Në lidhje me paratë e marrë nga kunati i saj, ajo ka pretenduar se i janë nevojitur për kryerjen e disa ndërhyrjeve kirurgjikale te një anëtar i familjes.

Gjatë gjykimit ka rezultuar e provuar se ajo ka zhdëmtuar kallëzuesin A.Xh., duke ia kthyer paratë e marra. Po ashtu, ajo i ka kthyer një shumë prej 2200 eurosh kunatit të saj dhe përmes një deklarate noteriale ku thuhej se i kishte dhënë hua prej 20 mijë eurosh të pandehurës, të cilat janë konsideruar si rrethanë lehtësuese nga gjykata. (Panorama)
(ma.ar/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb