TIRANE- Ish-deputeti i Partisë Demokratike, biznesmeni Ndriçim Babasi ka sqaruar në një intervistë të shkurtër për “BalkanWeb” sherrin e ndodhur paraditen e sotme teksa demokratët bëheshin gati të nderonin Dëshmorët e Atdheut. Ai thotë se veprimi i tyre ishte mëse i drejtë, përballë asaj që e quajti “provokim nga ana e komunistëve”.
Babasi bën fajtor policinë që nuk ka ditur të koordinojë oraret për ta shmangur një përplasje të tillë. Ai shkon më tej kur thotë se komunistët kanë marrë bekimin e kryeminsitrit Rama për të provokuar me fotot e ish-diktatorit dhe thirrjet në emër të tij, për të cilin ka edhe një mesazh.
Zoti Babasi mund të na sqaroni si ndodhi përplasja mes përfaqësuesve të Partisë Demokraktike dhe veteranëve tek Varrezat e Dëshmorëve? A pati ndonjë të shoqëruar mes jush?
Në dijeninë time nuk ka asnjë të shoqëruar. Nuk mund të flas për një përleshje, por për një reagim të dhunshëm nga ana e komunistëve që vinin të provokonin me foton e “qoftëlargëtit”. Ne shkuam në orarin e caktuar për të bërë nderimet përkatëse dhe aty u ndeshëm me këtë grup. Ju thamë të hiqnin parullat dhe fotot sepse s’mund të vazhdohet me imazhin e “qoftëlargut” edhe pas 25 vitesh. Ata reaguan keq, kishin edhe shkopinj me vete. Por në të gjithë këtë histori, faji është i policisë. Ishte policia ajo që nuk diti të ndajë detyrat e veta. Kur ka aktivitet PS-ja, lejohen mbështetësit e PS, kështu ndodh me PD dhe me këta “qoftëlargëtit”, që duhet t’i kishin lënë në një tjetër orar.
Ju personalisht ishit mes atyre që u përfshinë në sherr?
Isha mes atyre që debatuan dhe po them që u bë shumë mirë që ndodhi ashtu. Le ta marrë vesh gjithë Shqipëria dhe Bota që PD është e fortë dhe mban qëndrimin e saj ndaj parullave të komunizmit. Ta marrin vesh edhe ata që i sollën aty
Kush mendoni t’i ketë sjellë aty?
Po ata nuk erdhën nga mendja e tre, janë të nxitur politikisht për të reaguar ashtu. Erdhën me qëllimin për të na provokuar, ishin provokatorë.
Pse i quani provokatorë?
Nuk i quaj, jam i bindur që ishin provokatorë, madje të organizuar mirë kësaj here. Por faji është i Edi Ramës, mbi të bien të gjitha përgjegjësitë
Keni një mesazh për kryeministrin?
Mesazhi i vetëm që kam për të është të rrijë larg nga këto akte provokatore. Të mos i nxjerrë gështenjat nga zjarri me duart e të tjerëve.
(m.a/BalkanWeb)