Menu Krye Të Fundit | Shqipëria |

Koalicioni? Aleati i Ramës: Ja deri kur mund të shtyhet afati për një marrëveshje të re

paskal

TIRANE- Kryetari i Partisë Demokracia Sociale, Paskal Milo shprehet se nuk ka nisur ende negociatat me Partinë Socialiste për koalicionin për shkak të krizës politike, por edhe për faktin se PS nuk ka komunikuar me partitë aktualisht në koalicion për një marrëveshje të dytë. Nisur nga kjo situatë, ai parashikon shtyrjen deri në fund të prillit të negociatave mes forcave të majta për koalicionin, përfshi këtu edhe LSI.

Sipas Milos, ka ende hapësira për negociata dhe zgjidhje konsensuale mes maxhorancës dhe opozitës për t’i dhënë fund krizës politike në prag të mbajtjes së zgjedhjeve. Në një intervistë për gazetën “Shekulli”, ai thotë se shtyrja e datës së zgjedhjeve do të ndodhë në rast se situata del jashtë kontrollit.

Zoti Milo sot është afati i fundit për regjistrimin e koalicioneve. Asnjë prej partive aktualisht në koalicionin e majtë nuk është shprehur për këtë. Si ju duket kjo situatë?

Mbështetur në zhvillimet aktuale politike ku nuk ka dialog midis maxhorancës dhe pozitës, për të gjetur një zgjidhje konsensuale të krizës, të gjitha afatet e procesit për zgjedhjet e 18 qershorit, do të rishihen, do të shtyhen. Tani për tani ka ende hapësirë për të shtyrë afatet, për shembull të krijimit të koalicioneve. Mendohet sipas zërave që dëgjohen, ky afat do të shkojë dikur nga fundi i muajit prill. Për rrjedhojë do të shtyhet edhe afati i dorëzimit të listave shumemërore të kandidatëve për deputetë të subjekteve politike me shpresë që Partia Demokratike dhe opozita do të kenë marrë një vendim deri në fund të muajit për të marrë pjesë në zgjedhje. Kështu qarkullojnë zëra që vijnë nga institucionet.

Partia e drejtuar prej jush ka një vendim për futjen sërish në koalicion parazgjedhor me Partinë Socialiste?
Ne ende nuk kemi marrë një vendim, sepse ende nuk kanë filluar negociatat për krijimin e koalicioneve. Deri tani ka pasur vetëm tentativa për të bërë kontakte por nuk janë realizuar kontaktet. Mesa sa duket çdo gjë ka mbetur pezull në funksion të zgjidhjeve që pretendohet që mund të arrihen gjatë ditëve të ardhshme për ta sjellë në proces opozitën.

Pritej që ministri i Jashtëm gjerman, në vizitën e tij të hënës të vendoste një dialog, por është parë që palët janë pozicionuar edhe më prerë në qëndrimet e tyre. Duke parë situatën aktualisht sa shanse ka të zgjidhet shpejtë situata dhe të vijohet me procedurat për zgjedhjet?

Mesazhet që përcolli ministri i Jashtëm gjerman në adresë të Partisë Demokratike dhe opozitës ishin shumë të forta dhe shumë të qarta. Nuk ishte ndonjë mesazh i panjohur sepse edhe përfaqësues të tjerë të qeverive të vendeve anëtare të BE-së dhe vetë nga institucionet e Brukselit i janë dërguar PD-së për t’u rikthyer në parlament dhe për të respektuar institucionet dhe për të bërë përpjekje për kompromis për të garantuar zgjedhje të lira dhe të ndershme. Pra, me pak fjalë ka gati një unanimitet në qëndrimet e faktorëve ndërkombëtarë për sa i përket nxitjes për ta sjellë PD-në në proces sa më shpejtë që të jetë e mundur. Në këto rrethana kur mungon një mbështetje ndërkombëtare tek e cila është shpresuar shumë, ka gjasa që PD-ja të fillojë të reflektojë se ka rrugë tjetër të arsyeshme për të kontribuar në mbarëvajtjen e procesit zgjedhor dhe në garantimin e zgjedhjeve të lira dhe të ndershme.

Opozita ka kërkuar shtyrjen e datës së zgjedhjeve, si një alternativ që do të garantonte procesin zgjedhor. Sa e mundur është realizimi i kësaj alternative?
Ndoshta ai mund të ishte një variant ekstrem kur do të jenë shteruar të gjitha përpjekjet për ta mbajtur procesin nën kontroll dhe për t’i bërë zgjedhjet deri në 18 qershor. Nëse procesi del jashtë kontrollit, atëherë patjetër që do të shtrohet edhe çështja e shtyrjes së datës së zgjedhjeve por ende ka rezerva dhe hapësira për ta mbajtur procesin, për ta menaxhuar atë dhe për t’i bërë zgjedhjet deri më 18 qershor.
(m.a/BalkanWeb)


Komente ( 3 )

  • Hani more hani ju parti ne cdo cep ju beft kanser ne 400breza djersa e kti populli .se ngelet sa her ka zgjedhje dilni ju cibanet e komunizmit te merni noj lek a ropt me liber shpie

  • E kuptoj rëndësinë e reformës zgjedhore dhe e mbështes plotësisht atë! Sidoqoftë të nisësh reforma për ti lënë në mes të rrugës në emër të një reforme tjetër do të thotë të mos bësh asgjë!
    Për momentin populli do reformën në drejtësi si një reformë me lidhje më të drejtpërdrejtë me hallet e tij. Pa diskutim që edhe leximi i saktë i votës së tij është me rëndësi edhe pse për shumë qytetarë të gjithë partitë politike i njëjti m.t janë. Por tani duam reformën në drejtësi dhe nuk na plas shumë se kush dhe qysh fiton njëra apo tjetra parti. Në 25 vite asnjëra nuk ka justifikuar besimin tonë.
    Bëni Reformën në Drejtësi jo për Evropën por për ne! Kur do ta kuptoni qe jeni bërë legena dhe o bëni diçka tani o kurrë më nuk ju votojmë!

KOMENTO

*E-mail nuk do te publikohet.
Komenti juaj do publikohet brënda 3 orëve , nëse përdorni fjalor ofendues , komenti nuk do të publikohet nga moderatori .


Copy Protected by Chetan's WP-Copyprotect.