“Besoj që sekretari Kerry vjen në Tiranë për të dhënë mesazhin e mbështetjes të reforma të ndërmarra, shpresoj shumë që të falënderoj ndër të tjera edhe Ministrinë e Mbrojtjes për punën e saj në mbrojtje të paqes e sigurisë në botë”, deklaron ministrja e Mbrojtjes Mimi Kodheli, në një intervistë për “Deutsche Welle”.

Kodheli shtoi se “ne jemi duke kaluar në një proces të rëndësishëm siç është reforma në gjyqësor, një proces që qeveria Rama e ka marrë seriozisht e beson fort, është investuar po aq seriozisht dhe fort edhe nga SHBA dhe BE”.

E pyetur se a mund të jetë Shqipëria e rrezikuar nga “Shteti Islamik”, ministrja pohon se “Shqipëria është vend anëtar i NATO-s dhe çdo vend i NATO-s mund të jetë dhe është i rrezikuar nga ky kërcënim, si çdo vend që punon, lufton për vlera pozitive dhe i mbron ato mund të jetë rrezik për një strukturë që nuk ka aspak të bëjë me atë që pretendon së është në mbështetje të fesë islame, ajo është thjesht dhe vetëm një barbari”.

Ministrja theksoi se strukturat e sigurisë bashkëpunojnë dhe ndajnë informacionet e duhura, vetëm një bashkërendim i mirë i punëve mund të sjellë sukses në luftimin e këtij fenomeni, por mund të them se bashkëpunimi, sidomos shkëmbimi i informacionit midis vendeve anëtare të NATO-s, apo mes vendeve të rajonit bën të mundur që ky fenomen të përballet. I ashtuquajturi “Shtet Islamik” nuk është ndarë e organizuar si një shtet, ata veprojnë të organizuar mbi një bazë ideologjike, që nuk ka të bëjë me fenë së cilës i përkasin, por që ndërkohë mund të dëmtojë këdo që i vihet kundër.

Çështja e refugjatëve ishte temë kryesore në Konferencën e Sigurisë në Mynih. Vitin e kaluar Shqipëria ishte një vend burim i emigracionit, tani problemi është tejkaluar, por flitet se mund të kthehet tani në vendkalim refugjatësh, nëse mbyllet kufiri i Maqedonisë.

Lidhur me këtë, ministrja Kodheli tha se “Shqipëria ka qenë burim emigrantësh ekonomikë, njerëz që kërkojnë një treg më të madh pune, jetë më të mirë, dhe nuk duhet harruar se Gjermania në vit ka rreth 200.000 emigrantë ekonomikë polakë, e askërkush nuk flet për emigracion polak, se shihet një lëvizje normale aty ku tregu i punës ofron më shumë. Por për të mos u kthyer në problem, sepse pas sirianëve ishin shqiptarët të cituarit si numri më i madh prezent i emigrantëve, kemi marrë masa drastike për të kontrolluar përpara se shqiptarët të dalin nga kufijtë. Nga ana tjetër duhet të punojmë fort që reformat tona të japin fryte, të krijojmë vende pune, në mënyrë që tendenca për t’u larguar nga vendi të jetë në ulje”.

E pyetur se çfarë masash ka marrë qeveria nëse përballet me një fluks refugjatësh, Kodheli, sigurisht përveç faktit që duhet të kesh para dhe logjistikë për të përballuar fluksin e refugjatëve, duhet të kesh politika të drejta për të mos e konsideruar fundin e botës këtë, por për ta parë si një tragjedi biblike, tek e cila duhet të japësh rol pozitiv. Kujtoj luftën e Kosovës, kur në Shqipëri erdhën rreth 1 milionë kosovarë, kur Shqipëria vetë është rreth 2,8 milionë banorë e kjo nuk e bëri Shqipërinë as më të traumatizuar, as më të varfër e as më me probleme, por e ngriti lart imazhin e saj.

“Njerëzit që ikin nga terrori në shtëpitë e tyre janë të mirëpritur në një vend si Shqipëria, pavarësisht se ne jemi të sigurt se ata nuk duan të qëndrojnë në Shqipëri, por të shkojnë në vende më të zhvilluara. Sigurisht ka një problem logjistik, sepse Shqipëria është vend me rrugë të vogla, sigurisht do të jetë vetëm një vend tranzit. Ne jemi në kontakt të vazhdueshëm me fqinjët tanë italianë, maqedonas e kroatë, po ashtu kemi marrë masat tona logjistike nëse ata do duan të kalojnë përmes Shqipërisë”, deklaroi ministrja.

Për këtë, Kodheli sqaroi se “ne kemi ngritur një grup pune të Ministrisë së Mbrojtjes, të Ministrisë së Punëve të Brendshme, të Minitrisë së Drejtësisë e Transportit, si edhe të Drejtorit të Përgjithshëm të Policisë, emegjenca civile, shefi i Shtabit të Forcave të Armatosura, pra një grup pune që ka bërë përgatitje teorike për të mundësuar kalimin tranzit të refugjatëve të mundshëm”.

Ndërsa cili do të jetë roli i Shqipërisë krah aleatëve të NATO-s për ndaluar fluksin e refugjatëve, Kodheli, tha se përgjithësisht ky do të jetë një operacion që ka të bëjë me detin dhe ajrin. “Besoj se për momentin nuk do të jetë e nevojshme që Shqipëria të marrë pjesë direkt, sepse ende nuk janë përcaktuar të gjitha praktikat e procedurat nga strukturat e caktuara. Por si vend mesdhetar, Shqipëria është e interesuar në mënyrë të drejtpërdrejtë që të mundësojë një siguri më të madhe në ujërat e detet tona. Kemi kërkuar dhe po shohim bashkëpunimin me misionin Frontex të BE-së”.

E pyetur se sa interes ka lidhur me ofrimin në treg të avionit MIG të trashëguar nga komunizmi, Kodheli sqaroi se “që nga emërimi im si Ministre e Mbrojtjes të gjitha ankandet, qofshin edhe ato për produkte ushtarake janë ankande të hapura. Shqipëria ka shitur edhe më parë, por procedurat kanë qenë të mbyllura. Janë përgjithësisht avionë të dhuruar në vitet 50-të apo 60-të nga rusët apo kinezët”.

A janë të interesuar rusët apo kinezët për ta si elementë muzealë, ministrja e Mbrojtjes u përgjigj se “ankandi do të jetë i hapur, ne na intereson të pastrojmë tunelet tona që nuk i hyjnë në punë askërkujt, përkundrazi na kushtojnë sepse na duhet t’i mirëmbajmë e interesi ynë është të shtojmë buxhetin e Ministrisë së Mbrojtjes”.

(el.sp/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: