TIRANE- Pas sasisë rekord të kokainës së zbuluar në Portin e Durrësit me vlerë rreth 180 milion euro nëse do të hidhej në treg, “BalkanWeb” publikon edhe fotot e pronarit të firmës “Arbri Garden” shpk që porositi kontejnerin me banane nga Kolumbia, Arbër Çekaj (në kërkim) dhe menaxherit të saj, shtetasi Donald Lushaj (i arrestuar).
Bashkë me menaxherin në kuadër të operacionit të koduar “Last Snow”, në pranga ra edhe shoferi i firmës 25-vjeçari Armando Pezaku.
Sakaq, burime të “BalkanWeb” bëjnë me dije se Policia e Shtetit po punon intensivisht për të kapur të shpallurin në kërkim, por edhe për të rënë në gjurmët e personave të fuqishëm që mendohet se fshihen pas tyre, e se kanë lidhje të drejtpërdrejt me trafikun e kokainës.
Të njëjtat burime saktësojnë se hetimet pritet të nisin edhe në strukturat e doganës dhe të policisë kufitare, pasi ka dyshime të forta se ka të implikuar edhe në radhët e tyre.
Kamioni brenda të cilit fshihej sasia rekord prej 613 kg kokainë u kap në momentin që mbërriti në porën e firmës porositëse, ndonëse droga u pikas që në portin e Durrësit.
Hetimet kanë dokumentuar se lënda narkotike ishte nisur me kontenier nga Kolumbia duke kaluar tranzit përmes Italisë, në Maltë e më pas me anije ka mbërritur në Portin e Durrësit në Shqipëri, në datën 19 shkurt 2018.
NJOFTIMI I POLICISE
Policia e Shtetit në bashkëpunim me Prokurorinë e Krimeve të Rënda dhe Drejtorinë e Hetimit Doganor, mbi bazën e informacioneve të siguruara më herët dhe analizës së riskut, pas një pune të mirë organizuar dhe të koordinuar, ka arritur të finalizojë me sukses operacionin e koduar “Last Snow”.
Si rezultat i këtij operacioni u bë i mundur kapja dhe sekuestrimi i një sasie rekord prej 613 kilogramë e 350 gramë lënde narkotike e dyshuar kokainë, me vlerë tregu mbi 180 milion euro.
Hetimet kanë dokumentuar se lënda narkotike ishte nisur me kontenier nga Kolumbia duke kaluar tranzit përmes Italisë, në Maltë e më pas me anije ka mbërritur në Portin e Durrësit në Shqipëri, në datën 19 shkurt 2018.
Kokaina ishte e fshehur në kontenier me dysheme të dyfishtë, të ngarkuar me banane.
Operacioni ka nisur gjatë mbrëmjes së datës 27 shkurt 2018, në Portin Detar të Durrësit, në momentin që ngarkesa e ligjshme me banane, u mor në dorëzim nga firma porositëse “Arbri Garden” shpk, me pronar shtetasin A.Ç.
Sasia e lëndës narkotike ishte e paketuar në 528 pako, të mbështjella me letër natriban me kode të vendosura nga trafikantët.
Kontenieri i mbërritur në Portin e Durrësit, u mbajt nën vëzhgim të pandërprerë deri sa mbërriti në magazinat e firmës, nga strukturat e Policisë së Shtetit.
Shërbimet e Policisë kanë rrethuar në perimetrin e jashtëm objektin e më pas kanë ndërhyrë në brendësi të magazinës. Pas kontrollit të imtësishëm të kontenierit, kanë bërë të mundur gjetjen dhe sekuestrimin e lëndës narkotike.
Nga tërësia e veprimeve të kryera, rezultuan të përfshirë në këtë aktivitet kriminal shtetasit dhe u arrestuan në flagrancë:
– Donaldo Lushaj, 25 vjeç, lindur në Tropojë dhe banues në Tiranë;
– Armando Pezaku, 25 vjeç, lindur dhe banues në Durrës.
Gjithashtu u shpall në kërkim shtetasi A.Ç., pronari i firmës ku u sekuestrua lënda narkotike.
Autoritetet shqiptare po vijojnë hetimet ngushtësisht me partnerët e huaj për të zbuluar gjithë lidhjet dhe personat e përfshirë në këtë aktivitet kriminal.
Ndërkohë po vijon puna për evidentimin e pasurive të të arrestuarve dhe të përfshirëve në këtë trafik narkotikësh.
Policia e Shtetit është e vendosur të godasë me Forcën e Ligjit çdo paligjshmëri dhe aktivitet kriminal, për të ndërtuar një Shqipëri më të qetë e të sigurtë.
(m.a/BalkanWeb)
