TIRANE – Ashtu si çdo të hënë, Partia Socialiste ka mbledhur grupin parlamentar mëngjesin e sotëm. Kjo mbledhje bëhet pak para seancës parlamentare për zgjedhjen e kryeprokurorit të përkohshëm.
Gazetarja Marsela Karapanço referuar burimeve brenda mbledhjes konfirmoi për BalkanWeb se në këtë mbledhje është rënë dakord që të mbështetet unanimisht kandidatura e Arta Markut për kryeprokurore të përkohshme.
Kujtojmë se pjesë e garës, janë prokurorët: Arta Marku, zv.drejtuese e Prokurorisë së Rrethit Shkodër dhe Ferdinand Elezi, drejtues i Prokurorisë së Durrësit. Ndërkohë që kandidatja e tretë është Ermira Tafani, prokurore në Elbasan.
Ndërkohë kanë mbetur edhe pak minuta nga nisja e protestës opozitare jashtë ambienteve të Parlamentit për të kundërshtuar këtë vendim të qeverisë.
Qytetarë nga i gjithë vendi janë nisur drejt kryeqytetit me makinat e tyre private apo me autobusë për t’iu bashkuar protestës.
Pjesa e jashtme e parlamentit është rrethuar nga forca të shumta policore.
(e.f/BalkanWeb)