Emiri i Katarit Sheikh Tamim Bin Hamad Al Thani, priti dje këshilltarin e lartë të presidentit amerikan Jared Kushner, dhe të dërguarin special për negociata ndërkombëtare Jason Greenblatt, ku diskutuan një sërë çështjesh me interes të përbashkët, përfshirë procesin e paqes në Lindjen e Mesme, si dhe gjendjen humanitare në Rripin e Gazës.
Gjatë takimit u konfirmuan lidhjet e ngushta të miqësisë dhe bashkëpunimit midis Katarit dhe Shteteve të Bashkuara në shumë fusha të ndryshme.
Në një deklaratë për shtyp lëshuar të enjten, Shtëpia e Bardhë njoftoi se Emiri i Katarit u takua në Doha me Jared Kouchner dhe Jason Greenblatt, ku u shqyrtuan mënyrat e rritjes së bashkëpunimit ndërmjet Shteteve të Bashkuara dhe Katarit, si dhe sigurimin e ndihmës humanitare për palestinezët në Gaza, në përpjekje të presidentit amerikan Donald Trump për menaxhimin e paqes mes izraelitëve dhe palestinezëve.
Vizita e Kushner në Doha erdhi pas takimit të tij me mbretin e Jordanisë Abdullah II dhe Princin e kurorës saudit Mohammed bin Salman, gjatë të cilit u diskutuan hapat operative të marrëveshjes së ashtuquajtur “marrëveshje e shekullit”, si një mundësi për t’i dhënë rrugë çështjes palestineze dhe procesit të paqes në Lindjen e Mesme.
Më herët, Kushner dhe Greenblatt takuan në Kajro presidentin egjiptian Abdel Fattah Al-Sisi, në prani edhe të ministrit të jashtëm egjiptian Sameh Shukri dhe Drejtorit të Përgjithshëm të Inteligjencës Abbas Kamel.
(BalkanWeb)
