TIRANE– Në një kohë kur sot Ministria e Drejtësisë bëri shpalljen për vend vakant të Kryeregjistruesit, vjen reagimi i drejtoreshës së Hipotekave, Blerina Doracaj. Kjo e fundit në një prononcim për ‘BalkanWeb’ mohoi faktin se është shkarkuar nga kryeministri Edi Rama, ndërsa theksoi se ajo vijon punën normalisht. Doracaj, e cila u emërua dy muaj më parë nga kreu i qeverisë, tha se deri më tani nuk ka asnjë propozim apo urdhër për shkarkimin e saj.
“Nuk ka asnjë propozim apo urdhër për shkarkimin tim. Jam në krye të detyrës që më është besuar nga kryeministri, në shërbim të qytetarëve.”, pohoi për ‘BalkanWeb’ drejtoresha e Hipotekave Blerina Doracaj.
Ndërkohë, pyetjes se si e komentonte faktin që Ministria e Drejtësisë shpalli sot pozicionin e saj si vend vakant, Doracaj u përgjigj se: “Unë jam në krye të detyrës dhe do jem aty deri në përmbushje të detyrimeve ligjore dhe në shërbim të qytetarëve”.
Duhet të theksojmë faktin se Doracaj ishte pjesë e listës së kandidatëve të PS së Tiranës, e 23-ta në listë. Aktualisht ajo është edhe kryetare e Forumit të Gruas në Partinë Socialiste.
Më poshtë po ju sjellim njoftimin e Ministrisë së Drejtësisë për shpalljen e vendit vakant të Kryeregjistruesit:http://www.drejtesia.gov.al/al/newsroom/lajme/njoftim-per-shtyp1509623426
(ed.me/BalkanWeb)
