Vajza 14-vjeçare Reem Sahwil, e cila qau në sy të Kancelares Angela Merkel për faktin se nuk donte që të riatdhesohej në vendin e saj, në Palestinë, mund të qëndrojë në Gjermani.
Gjatë një emisioni televiziv, Reem Sahwil, i tha Kancelares në gjuhën gjermane se prej katër vitesh në Gjermani ende kishte statusin e refugjates bashkë me familjen e saj dhe se nuk dinte se çdo të bëhej me të ardhmen. Por Kancelarja ishte e prerë duke i thënë se nuk mund të qëndronte në Gjermani, për faktin se kjo do të shkaktonte një valë refugjatësh për të cilën vendi i saj do të ishte i papërgatitur.
Pas kësaj ngjarjeje ka reaguar edhe ministri për Politikat e Emigrimit në Gjermani, Aydan Oezoguz, i cili tha se nuk e njihte rastin personalisht, por tha se vajza fliste në mënyrë perfekte gjermanishten dhe jeton prej kohësh në vendin e tij.
“Pikërisht për persona si ajo sapo kemi modifikuar ligjin, për t’i dhënë këtu tek ne një perspektivë të rinjve që janë integruar”, ka thënë Oezoguz, sipas agjencisë së lajmeve “Ansa”.
Ligji i ri i qeverisë federale është aprovuar nga Bundestag dhe Bundesrat dhe do të hyjë në fuqi këtë verë. Ky ligj parashikon që adoleshentët e huaj të cilët kanë jetuar për të paktën katër vite në Gjermani, pa lëvizur nga ky vend, mund të marrin lejen e qëndrimit.
Por, ky ligj përgjithësisht iu vjen në ndihmë të gjithë njerëzve që prej kohësh jetojnë në Gjermani, ku dhe janë integruar, e që nuk kanë e kanë marrë ende përgjigjen e kërkesës për azil. Aktualisht në Gjermani këtë kërkesë e kanë 125 mijë persona.
(m.k/BalkanWeb)