ATHINE- Parlamenti grek ndodhet sot në qendër të betejës politike të shkaktuar nga marrëveshja mes Athinës dhe Shkupit për emrin e Maqedonisë, pasi kryeministri Aleksis Cipras do të përballet me një mocion mosbesimi nga opozita e djathtë.
Qeveria e Ciprasit, që disponon një maxhorancë prej 154 votash nga 300, duhet të dalë e paprekur nga votimi, parashikuar në orën 11:00 GMT, një ditë para nënshkrimit të kësaj marrëveshjeje për t’i dhënë fund një konflikti 27-vjeçar.
Por, klima politike është tendosur ndjeshëm në të dy krahët e kufirit pas njoftimit të marrëveshjes.
Përshëndetur nga OKB-ja, Bashkimi Europian dhe NATO, ajo parashikon që ish-Republika jugosllave e Maqedonisë të quhet “Maqedonia e Veriut”.
Cipras e cilësoi dje në mbrëmje këtë marrëveshje si fitore e rëndësishme historike për Greqinë.
“Ne kemi treguar se atje ku ekziston një vullnet, një konflikt i vjetër prej disa dekadash mund të zgjidhet në mënyrë të ekuilibruar”, theksoi Cipras.
Një manifestim para Parlamentit është parashikuar sot në mbrëmje.
(BalkanWeb)
