TIRANË- Një javë debatesh, akuzash e madje edhe kërcënimesh kemi parë këto 7 ditë nga Tirana zyrtare por rubrika argëtuese e emisionit “Kjo javë” në News24, e sjell politikën plot humor dhe pa vijë të kuqe.
Të gjithë kanë ca emocione para se të dalin para mediave. Ashtu ndodh dhe për Artan Lamen e Edmond Spahon…
Kush tha që parlamenti është vetëm për debate e të shara. Ka edhe përkëdhelje, siç në fakt duket me dorën e ngrohtë të Erion Braçes mbi supin e deputetes së Fierit Antoneta Dhima. Përfaqësojnë Myzeqenë të dy dhe kjo trevë e Shqipërisë është e ngrohtë dhe e butë, siç duken dhe dy deputetët në pamje. Po ministrja e Mbrojtjes çfarë pati? Apo ‘dashuria’ është ngjitëse?! Edhe ajo i vendos dorën mbi shpatulla kolegut të saj Braçe.
Nga selia e PD kanë dalë shumë lajme kohët e fundit, por edhe dy deputetët Flamur Noka dhe Enkelejd Alibeaj, e pas vjen edhe Edi Paloka, duhet thënë tre nga më aktivët nga selia blu. Serbes-serbes Tom Doshi hyn në sallën e parlamentit. Çuditërisht ai duket nga më të ‘urtët’ tani pas situatave të nxehta që vijnë çdo të enjte nga parlamenti.
Një sekuencë nga seanca e kaluar kur opozita rrethon foltoren nuk mund të mungonte në rubrikën argëtuese të “Kjo javë” në News24. Ndërkohë kreu i PD-së Lulzim Basha dikujt nga maxhoranca i hakërrehet. “Hajde ta tregoj unë se sa vlen koka e kujt”, i drejtohet ai, ndërsa mban në dorë një dosje, shkruan “BalkanWeb”.
Po kryeministri Edi Rama vallë çfarë bluan në mendje, teksa me gjithë aksionin në sallë, rri aq i menduar në vendin e tij në parlament?! Duket se gjëra të mira nuk po mendon për opozitën…Pastaj krejt papritur i hakërrehet ministrit Ditmir Bushati duke folur me gjithë trupin e tij.
Dash Shehi nuk duket i qetë në komision, teksa iu drejtohet kolegëve të maxhorancës. “Po për çfarë e bëni ju këtë, për unitetin e partisë? E doni thjesht përgjigjen, për frikën që keni nga zoti Rama. Dekla me ujkun që ti më turbullon ujin. Po çfarë ju turbullojmë ne ju? Ju jeni 75 deputetë, edhe nja 5-6 i keni marrë, i keni blerë knej brenda. Ju doni të na mbyllni dhe gojën”, thotë Shehi.
Braçe përmend lekët në komisionin e ekonomisë. “Lefta, lefta…ishte super për Zotin. Fatmir ajo kënga lefta-lefta ishte…lefta-lefta Fatmir aman, aman”, thotë Braçe që me sa duket i drejtohet Mediut. Shëndeti i Presidentit, një gëzuar dhe një shfaqje në valle me “Baftjarin”. Dashuria e qytetarëve për ish-ministrin e Brendshëm nuk mungon në momentet e vështira.
(m.k/BalkanWeb)
