TIRANË- Elena Avdillari, 23-vjeçarja që vdiq pas mesnate bashkë me taksistin që e shoqëronte drejt Tiranës, jetonte me prindërit e saj, ndonëse ishte e martuar.
Fotot e shtëpisë përdhese dhe modeste aty ku nëna vazhdon kujën, edhe pas ceremonisë së varrimit, ka mundur t’i sigurojë për “BalkanWeb” gazetarja Dorjana Bezat.
Pak fjalë dhe pak detaje për të bijën, më shumë lot e dhimbje në sytë e gruas që pranon vështirësitë ekonomike. “Unë punoj në fshesë, turni i tretë çdo natë, Vajza ishte e martuar, por jetonte tek ne dhe na ndihmonte financiarisht pasi jemi të varfër”,- thotë mes lotësh Rozafa Glloga.
Sipas nënës, e bija kishte nisur një punë në Itali me shoqet, dhe mbrëmë do të shkonte atje për herë të katërt. Por gruaja e veshur me të zeza nuk di të sqarojë arsyet e kthimit të saj.
Nëna thotë më tej se personin që ka përplasur taksinë, tropojanin që u largua nga vendi i ngjarjes Fatjon Zhaporja ajo nuk e njihte.
“Të shpallurin në kërkim nuk e njohim, i bëjmë apel shtetit që ta gjejë e të vihet para përgjegjësisë”,- shtoi më tej Rozafa.
(m.a/BalkanWeb)