TIRANE– Kryeministri Edi Rama i është përgjigjur rinjve të Partisë Demokratike, të cilët rrethuan disa nga institucionet e vendit, duke protestuar në kuadër të ditës së Rinisë, 8 Dhjetorit. Përmes një postimi në rrjetin social “Facebook”, kreu i Qeverisë, fton protestuesit që të lexojnë rezultate për Shqipërinë në programin PISA 2015.
“Të rinjtë e nxitur nga partitë që protestojnë për arsimin të lexojnë rezultatet e Shqipërisë në programin PISA2015 “, shkruan Rama, duke shpërndarë lajmin e një dite më parë, ku Komisioni Evropian i ka dërguar një letër vlerësimi Ministrisë së Arsimit në Programin Ndërkombëtar për Vlerësimin e Njohurive të Nxënësve (PISA) për rezultatet e studimit të vitit 2015.
Kështu, bazuar në raportin e publikuar pardje të PISAs, letra që mban firmën e përfaqësuese së Komisionit Evropian për Arsimin dhe Kulturën, Helene Skikos, vlerëson ministren Nikolla për punën që ka bërë në fushën e arsimit.
Në këtë letër, shprehet vlerësim edhe për punën e kryeministrit për reformat që janë ndërmarrë në fushën e arsimit.
“Jemi shumë të lumtur për mbështetjen që ministrja e Arsimit dhe kryeministri u kanë dhënë reformave në arsim në Shqipëri. Pranoni përgëzimet tona për rezultatet fantastike që 15vjeçarët shqiptarë arritën në PISA 2015. Urime dhe mos hiqni dorë. Reforma në edukim është një rrugë e gjatë”, shkruan letra e Helene Skikos.
(el.sp/BalkanWeb)
