Menu Krye Të Fundit | Shqipëria |
FLASH

Requiem për “çunat e Sajmes”

ANDI_BUSHATI_PORTRET-2_2-600x394

Nga Andi BUSHATI
Diçka ka ngecur në propagandën e Rilindjes. Për katër vite na u tha se kishim policinë që donim; Se kishim hequr nga rrugët mustaqellinjtë barkderrë për t’i zëvendësuar me djem dhe vajza të reja të devotshëm; Se korrupsioni ishte zhdukur dhe kriminelët nuk largoheshin më në drejtim të paditur.

Miti i policisë që duam u pompua me spote televizive dhe me konferenca marramendëse ku asistonin edhe diplomatët e huaj.

Mjerë kush ishte kritik ndaj tij. Të flisje për “çunat e Sajmes”, që i linin kriminelët të iknin etiketoheshe menjëherë si pjesë e makinerisë së baltës. Të përmendje batërdinë e kultivimit të hashashit, ishe menjëherë pjesë e kazanit të shpifjeve.

Por tani, me fillimin e mandatit të dytë të Ramës, duket sikur gjithçka ka ndryshuar. Vetë kryeministri në fjalën e tij të parë në parlament falenderoi opozitën për rolin që kishte luajtur në denoncimin e kanabisit dhe pranoi si pa të keq se na paskësh gënjyer për katër vite me radhë.

Megjithëatë, çudia nuk përfundon këtu.

Lapsi.al ka publikuar sot një analizë shteruese ku shpjegohet se si ministri i ri i Brendshëm po çmonton gjithçka që trashëgoi nga paraardhësi i tij (lexo shkrimin poshtë/Lapsi.al). Proceduarat e tenderave të Tahirit po anullohen nga Xhafa, drejtorët e policisë që punuan me të janë hequr të gjithë nga puna, njerëzit e tij të afërt janë lënë në hije si të pabesueshëm.

Natyrisht, askush nuk mund të gëlltisë sapunin për djathë dhe të besojë se mëkatet e policisë duhet të bien mbi ministrin e larguar. Që prej 2013 edhe policia, ashtu si i gjithë shteti, drejtohet me dorë të hekurt nga Rama. Sajmir Tahiri mund të fajësohet për lidhjet me kriminelët, po aq sa Ilir Beqja për tenderat që u dha koncesionarëve të shëndetësisë, apo Eron Veliaj për grataçielat që u ka firmosur oligarkëve të Tiranës. Të gjithë e dinë se pas tyre fshihet një dorë e vetme dhe, faji i atyre që kanë nënshkruar, është se nuk kanë ditur t’i rezistojnë.

Por tani Rama, i diskredituar në publikun vendas dhe i kapur mat nga partnerët ndërkombëtarë, po bën gjithçka për të treguar se të gjitha fajet i ka pasur Sajmir Tahiri. Ai në fakt po përsërit të njëjtën lojë të vjetër, që luajti kur ishte në krye të bashkisë së Tiranës. Edhe atëherë, pasi u doli boja rryshfeteve të mëdha që jepeshin për lejet e ndërtimit në kryeqytet, ai i hoqi qafe një e nga një edhe Gonxhen, edhe Lamen, edhe Kodhelin. Qëllimi ishte i qartë: fajin për këtë e kanë të tjerët dhe unë nuk kam ditur gjë.

Tani në kryemistri, ai po përpiqet të inskenojë kapitullin e dytë të të njëjtit serial, duke krijuar përshtypjen se i gjithë mëkati ka qenë i Saje Qorrit (nuk do të jetë çudi që një ditë ta thërrasi edhe ai si Berisha) dhe i çunave të tij.

Dhe deri këtu, në raportin e shefit me vartësin, Rama është në të drejtën e tij. Nëse njeriu me të cilin ka ndarë pushtetin, influencat, lidhjet me krimin dhe paratë që burojnë prej tij, e pranon këtë linçim, kjo është një çështje e krenarisë apo e nënshtrimit personal. Ai mund të rebelohet ose të ulë kokën.

Por, përpos raportit Rama- Tahiri, kjo histori ka edhe në anën tjetër. Atë që duhet të ketë qeveria me publikun. Dhe pikërisht këtu propaganda e Rilindjes ka ngecur. Sepse nga njëra anë ajo vazhdon t’a quajë historinë e policisë që deshëm një histori suksesi dhe nga ana tjetër do të përbaltë njeriun që e ka drejtuar për katër vite atë. Pra ajo po përpiqet të shesë fabulën e pamundur të një policie perfekte, të drejtuar nga një kupolë mëkatarësh. Dhe këtë zor se është në gjendje ta besojë ndokush. (Lapsi.al)


Komente ( 5 )

  • O Sulke, ke bere nje diskutim te shkelqyer, tamam si ne kohen e mbledhjeve te organizates baze.

  • Cdo detyre e re do kohen e vet ndaj nuk ka pse nenvlereson askush askend.Normal dhe tahiri ka len pune pa bere se ndryshe I bie qe mos te kishte me krim dhe droge. Punen e lene pezull nga ai do e vazhdoje ministri aktual ose kushdo tjeter qe do ishte ne vendin e tij.

  • Ndoshta ministri i ri ka me shume mbeshtwtjen e nderkombetareve dhe normal kjo mbeshtetje do reflektohet dhe ketu..e rendesishme eshte qe te beje punen mire..dhe ska asgje t keqe nese njerzit perpiqen te bejne me mire se paraardhesi i tyree..

  • Nje pune qe te behet do kohen e vet ne menyre qe te funksionoje si duhet. Ne deri me sot kemi degjuar vetem per droge,krim te organizuar dhe funksionare te cilet shperdorojne detyren. Ish Ministri Tahiri punoi aq sa ishte,ishte njeri praktik dhe normalisht e nxorri vendin disi nga gjithe ai llum qe e kish mbuluar,filluar kjo nga droga e pakontrolluar e Lazaratit.
    Nuk kemi deguar te hidhet posht puna e dikujt qe punoi por as nuk mund te vihet ne dyshim dhe puna qe po behet aktualisht. Dhe ish Ministri ka len shum pune pezull,krimi dhe droga evolojne,kriminelet e sotem zbulohen neser dhe ministrit aktual i mbetet te vazhdoje te punoje ashtu si e ka nisur, me nismat qe ka ndermarre dhe te ecim ne rrugen e luftes totale kunder kanabisit dhe krimit te organizuar.

  • Po ik o bushati se ngele duke shpifur dhe ti. E vetmja gj qe duhet luftuae eshte krimi



Copy Protected by Chetan's WP-Copyprotect.