Presidenti i Turqisë, Recep Tayyip Erdogan ka akuzuar kancelaren gjermane, Angela Merkel se mbështet terroristët.

“E nderuara Merkel, ti mbështet terroristët”, ka thënë Erdogan gjatë një interviste të drejtpërdrejtë për rrjetin A Haber.

“Zonja Merkel, pse po i fsheh terroristët në vendin tënd? Pse nuk po bën asgjë”, ka thënë Erdogan, duke akuzuar Berlinin se nuk po përgjigjet për 4,500 dosjet e dërguara nga Ankaraja për të dyshuarit për terrorizëm, shkruan Rel.

Erdogan gjithashtu ka akuzuar televizionin shtetëror gjerman për mbështetje “të organizatave terroriste” dhe për përhapje të propagandës kundër sistemit presidencial.

Ai nuk tha saktësisht se cilat janë organizatat terroriste por duket se këto komente janë referencë për Partinë e Punëtorëve të Kurdistanit (PPK), grup të cilin Turqia dhe Bashkimi Evropian e cilësojnë terrorist.

Komentet e Erdoganit vijnë në kohën e rritjes së tensioneve në mes të Ankarasë dhe vendeve të tjera evropiane, për shkak se disa vende kanë anuluar tubimet e ministrave turq për një referendum që zgjeron kompetencat e Erdoganit.

Javën e kaluar, Erdogan i krahasoi me “praktika naziste”, vendimin për anulim të disa tubimeve politike të zyrtarëve të Turqisë, në qytetet gjermane. Referendumi për ndryshime kushtetuese në Turqi, pritet të mbahet në muajin prill.

(m.k/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: