Nga Shaban MURATI
Nëse dikush në çdo cep të Europës do të kishte guxuar të ngrinte memorial apo të bënte ceremoni shtetërore lavdërimi për ushtarët nazistë, do të kishte rënë tërmet politik, diplomatik, juridik dhe propagandistik në shkallë kontinentale. Por nuk ndodhi asgjë, kur Presidenti i Serbisë, Aleksandër Vuçiç, përuroi në 14 qershor memorialin e ushtarëve serbë, të vrarë në prillin e vitit 1999, në kulmin e ofensivës ushtarako-policore serbe për spastrimin etnik dhe gjenocidin kundër popullit shqiptar të Kosovës, ku u vranë 15 mijë shqiptarë, u zhdukën disa mijëra të tjerë dhe u dëbuan me dhunë nga shtëpitë e tyre mbi një milion shqiptarë. Spastrimi etnik dhe gjenocidi që ndërmorën forcat ushtarake serbe kundër popullit shqiptar, ishte krimi i madh shtetëror kundër njerëzimit, i cili e bëri Europën demokratike, bashkë me SHBA, që të ndërhynin me fushatën ajrore mbi objektet ushtarake serbe dhe ta detyronin ushtrinë dhe qeverinë e diktatorit Sllobodan Millosheviç të kapitullonte e të largohej nga Kosova. Në luftën për mbrojtjen e jetës, familjeve dhe të lirisë së popullit u ngritën me dhjetëra mijëra luftëtarë të UÇK për t’i rezistuar agresionit fashist serb.

BE duhet të reagojë ndaj kësaj shfaqjeje të turpshme zyrtare të Serbisë në mbrojtje të krimit të luftës, sepse presidenti, qeveria dhe shteti serb po glorifikojnë politikën e spastrimit etnik dhe të gjenocidit kundër popujve të tjerë. Domethënia e këtij veprimi është se presidenti dhe qeveria e Serbisë e mbrojnë dhe janë gati ta përsërisin atë politikë fashiste të Millosheviçit ndaj popujve jo serbë në Ballkan. Presidenti serb e cilësoi luftën barbare të forcave fashiste serbe kundër popullit shqiptar në Kosovë si “Termopilet serbe”. Ai shtiret sikur nuk e di që lufta e Koshares ishin Termopilet shqiptare, sepse pushtuesi ishte Serbia, e cila po zbatonte spastrimin etnik të popullit shqiptar, që jetonte në trojet e veta. Sipas logjikës fanatike nacionaliste të presidentit serb, të cilit ka mbetur ora te koha kur ishte anëtar i qeverisë së Millosheviçit, i bie që krimineli ndërkombëtar i luftës, Millosheviç, të shpallet “Leonidha i ri i Serbisë”. Me këto qëndrime, Vuçiç sfidon Europën dhe OKB-në, të cilët e kanë damkosur Millosheviçin si kriminelin më të madh ndërkombëtar të luftës në Europë, që nga mbarimi i Luftës së Dytë Botërore. Presidenti serb sfidon Europën, sepse sapo u betua si president, shpall politikë zyrtare reabilitimin dhe glorifikimin e gjithë kriminelëve serbë të luftës dhe të gjithë forcave ushtarake serbe që kanë kryer krime lufte në Kosovë, në Bosnjë, në Kroaci, etj.

Shkrimin e plotë mund ta lexoni në Gsh.al duke klikuar në linkun më poshtë:

http://www.gsh.al/2017/06/19/serbia-e-do-nje-reagim-nga-be-tirana-dhe-prishtina/

 

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb