FIFA me gjasë ka mbetur shumë e habitur nga precedenti “shqiptar”. Organi më i madh drejtues i futbollit në Europë ka nxjerrë blof Federatën Shqiptare të Futbollit për ndeshjen San Marino-Irlandë e Veriut, e cila është e vlefshme për eliminatoret e Botërorit 2018 dhe do të zhvillohet këtë të shtunë.
FIFA i ka dërguar një shkresë FSHF-së ku i bën të ditur se për takimin në fjalë do të drejtonin arbitra shqiptar dhe për këtë arsye duhej të dërgonte katër emra, një arbitër kryesor, dy anësorët dhe një i katërt.
Në këto kushte, sektori i gjykimit në FSHF, duhet të dërgonte brenda një afati të shkurtër katër emra, pikërisht atë të kryesorit, dy anë-sorëve dhe arbitrit të katërt. Por, çfarë ndodhi dhe pse situata u bë qesharake? Emrat që u dërguan ishin ai i Enea Jorgjit si gjyqtar kryesor, Rejdi Avdos dhe Ridiger Çokajt si asistentë dhe Juxhin Xhajës si gjyqtar i katërt, raporton “panorama sport”.
Problemi qëndronte te arbitri i katërt, Juxhin Xhaja, i cili ende nuk e ka marrë stemën e FIFA-s. FSHF e dinte mirë këtë, por në pamundësi të një gjyqtari të katërt me stemën e FIFA-s menduan se mund të tolerohej. Mirëpo, ndodhi ajo që në kësi rastesh përbën një skandal dhe cenon rëndë marrëdhënien me institucionin më të lartë të futbollit në botë.
“Jemi të detyruar t’u kthejmë mbrapsht këto emra, pasi konstatojmë se një prej arbitrave nuk është në listën e FIFA-s. Ju lutem korrigjoni sa më shpejt gabimin”, – citohej ndër të tjera në shkresën që FIFA i ka dërguar FSHF-së. Pas këtij refuzimi, mësohet se përgjigjja e institucionit të futbollit shqiptar ka qenë epike.
“Ju mirëkuptojmë, por nuk kemi aktiv asnjë arbitër tjetër kryesor që ka stemën e FIFA-s”, – mësohet t’i ketë thënë FSHF-ja qeverisë së futbollit. Duke qenë se në muajin prill u pezulluan pa afat kryesorët Andi Koçi dhe Lorenc Jemini, të cilëve më pas iu hoq edhe stema e FIFA-s, i vetmi ndërkombëtar mbeti Enea Jorgji.
Mirëpo, FIFA nuk toleron për ndeshjet eliminatore të Botërorit dhe Europianit që një arbitër i katërt të mos ketë stemën e FIFA-s. Për më tepër, kërkohet që për ndeshje të këtij niveli, edhe pse mund të jesh arbitër i katërt, duhet patjetër të jesh kryesor dhe detyrimisht me stemën e FIFA-s.
Në këto kushte FSHF-së i mbeti vetëm një zgjidhje për të mos u turpëruar, të huazonte një arbitër nga kampionati kosovar. I vetmi i disponueshëm ishte Genc Nuza pasi Kosova nuk disponon një arbitër të dytë me stemën e FIFA-s.
Kësisoji, Komisioni i Caktimit të Arbitrave në FIFA ka pranuar dhe të shtunën zyrtarisht në San Marino-Irlandë e Veriut, kryesor do të jetë Enea Jorgji, asistentë Rejdi Avdo dhe Ridiger Çokaj, si dhe gjyqtar i katërt, kosovari Genc Nuza.
(e.k/BalkanWeb)