TIRANE– Pas 30 ditëve agjërim, përkushtim dhe lutje ndaj Allahut, besimtarët myslimanë festojnë sot ditën e Fiter Bajramit. Mijëra myslimanë janë mbledhur në orët e para të mëngjesit të sotëm në Bulevardin ‘Dëshmorët e Kombit’ në Tiranë për të falur namazin e kësaj dite të shënuar.

Gjatë fjalës së tij, Myftiu i Tiranës Ylli Gurra uroi të gjithë besimtarët për Fiter Bajramin dhe sakrificat e tyre të pranohen.

“Dita e Bajramit është dita e besimit të brengave dhe dita e të kujtuarit për njëri-tjetrin. Është dita e një jete të re, e pendesës për gabimet, e projekteve dhe veprave të mira. Sot është dita kur mëritë, hatërmbetjet, xhelozia dhe smira marrin fund. Bajrami është solidarizim me mbarë shoqërinë”- tha Ylli Gurra.

Redaksia e “BalkanWeb” uron të gjithë besimtarët myslimanë kudo që ndodhen Gëzuar Fiter Bajramin!

Pse festohet Fiter Bajrami
Fiter Bajrami është festa e cila bëhet pas mbarimit të muajit të Ramazanit. Emri Fiter Bajram vjen nga fakti se myslimanët para ditës së Bajramit shpërndajnë lëmoshë, solidarizohen me të varfrit, dhe kështu në këtë mënyrë festojnë së bashku këtë festë.

Zoti ligjësoi në fund të muajit të Ramazanit festën e Fiter Bajramit, gëzim për myslimanët, ashtu siç ligjësoi festën e Kurban Bajramit në ditën e dhjetë të muajit Dhul-Hixhxhe. Festa e Bajramit manifestohet duke falur namazin e Bajramit.

Namazi i Bajramit është obligim i domosdoshëm për çdo mysliman. Muhammedi i ka kushtuar rëndësi të veçantë duke i urdhëruar myslimanët që të falin këtë namaz.

Koha e namazit të Bajramit fillon me ngritjen e diellit nga horizonti sa një shtizë, derisa të arrijë në zenit.

Namazi i Bajramit ka dy rekate dhe dallon prej namazeve tjera për nga mënyra e faljes. Në rekatin e parë pas tekbirit fillestar merren shtatë tekbire, mandej lexohet sureja Fatiha dhe ndonjë sure tjetër. Pas plotësimit të rukusë dhe sexhdesë së rekatit të parë, ngritet për në rekatin e dytë dhe menjëherë merren pesë tekbire pas të cilëve lexohet Fatiha dhe ndonjë sure, më pas shkohet në ruku dhe sexhde e kështu përfundon namazi.

Përgatitja për festën e Bajramit

Elementet e përgatitjes për festën e Bajramit janë këto:-Larja e trupit.-Të stolisurit me rroba të bukura.-Ngrënia e hurmave para daljes për të falur namazin e Bajramit.-Të shkuarit herët në musal-la për të falur namazin e Bajramit.-Shkuarja në musal-la këmbas.-Ndërrimi i rrugës në shkuarje dhe kthim nga musal-la.

Pas festës
Prej shenjave të pranimit të adhurimit është vazhdimi i bamirësisë pas çdo vepre të mirë. Të parët tanë gjithmonë janë përpjekur që adhurimin ndaj Zotit ta përkryejnë, janë kujdesur që veprat e tyre të jenë në përputhje me sunnetin e Pejgamberit e me këtë, të jetë e pranuar tek Zoti.

(d.d/BalkanWeb)