TIRANE- Kryetari i Kuvendit, Ilir Meta, ka shprehur sot ngushëllimet dhe solidaritetin e plotë të Kuvendit të Shqipërisë me popullin britanik, pas sulmit tragjik në Londër ditën e djeshme.

Në një letër ngushëllimi drejtuar Kryetarit të Parlamentit Britanik, John Bercow, kryeparlamentari Meta thotë se të gjithë shqiptarët qëndrojnë përkrah popullit britanik, kundër terrorit dhe ekstremizmit.

LETRA E PLOTË:
Rt. Hon John BERCOW MP,
Kryetar i Dhomës së Ulët
London
UNITED KINGDOM
I nderuar Koleg,
Jemi thellësisht të tronditur dhe të trishtuar nga sulmi i djeshëm terrorist në Westminster.
Në emër të Kuvendit të Shqipërisë më lejoni t’ju përcjell ngushëllimet tona më të sinqerta për familjet e viktimave dhe lutemi për shërimin e shpejtë të të plagosurve nga ky sulm barbar.

Dënojmë këto akte të tmerrshme dhune dhe ofrojmë mbështetjen dhe solidaritetin tonë të plotë me popullin britanik si dhe me Dhomën tuaj të demokracisë në këto momente të vështira.

Ju siguroj se të gjithë shqiptarët qëndrojnë përkrah popullit britanik, kundër terrorit dhe ekstremizmit, dhe në mbrojtje vigjilente të vlerave tona të përbashkëta demokratike.
Ilir Meta
Kryetar i Kuvendit të Shqipërisë

(BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb