TIRANË- Arka të hapura dhe sigurisht bosh. Këto kanë gjetur efektivët e policisë së Tiranës brenda blindit të dytë të grabitur sot në mesditë në Qafën e Kasharit pranë rrugës së Rinasit.

Sipas të dhënave të vendngjarjes, autorët kanë marrë paratë brenda arkave, që mbajnë logon e Bankës së Shqipërisë, të cilat nuk dihet nëse kanë qenë valutë apo metale të çmuara pasi ende nuk janë bërë verifikimet.

Po kështu pranë blindit të dytë janë gjetur gëzhoja të shumta plumbash, çka do të thotë se autorët kanë qëlluar me breshëri të zgjatura. Të dyja makinat e blinduara kanë shenja të shumta plumbash, raportoi për “BalkanWeb”, gazetarja Dorjana Bezat. Grabitësi iu kanë kërkuar shoferëve të shtrihen në tokë dhe nën kërcënimin e armëve kanë marrë paratë. Por ekspertët e policisë nuk kanë arritur të gjejnë asnjë gjurmë gishtash, çka do të thotë se autorët kanë përdorur doreza.

Grabitja ndodhi sot rreth orës 14:30, ku autorët me dy makina, goditën 2 blinda të një banke dhe morën 7 thasë me para. Sipas të dhënave nga gazetarët e News24 dhe BalkanWeb në terren, grabitësit kanë ndjekur të njëjtin skenar si në grabitjen e ndodhur në Rinas në vitin 2016, ende e pazbardhur.

(m.k/BalkanWeb)