TIRANË- Deputeti demokrat Luçiano Boçi ka reaguar pas denoncimit të ish-kryeministrit Sali Berisha se një video e rëndë qarkullonte në një shkollë të Fushë-Krujës ku shfaqej mësuesi i matematikës. Boçi thotë se ky është fundi i edukimit, duke shprehur neveri për videon, ndërsa kërkon dorëheqjen e Ministres së Arsimit Lindita Nikolla.

Deputeti i PD-së shprehet se edukimi në shkollë ka marrë fund sepse i është goditur thelbi i funksionit të mësuesit dhe i shkollës, duke bërë Nikollën përgjegjëse.

Ish-kryeministri Sali Berisha publikoi denoncimin duke thënë se tek nxënësit qarkullon videoja perverse e mësuesit të matematikës, por se drejtoresha bën presion të mbyllë skandalin.

STATUSI I LUÇIANO BOÇIT
FUNDI I EDUKIMIT
Shokuese videoja e mësuesit të matematikës në shkollën 9-vjeçare “Adem Gjeli” në Fushë-Krujë.
Neveria nuk ka fund për ketë skenë.
Një goditje fatale psikologjike për fëmijët, por dhe figurën e mësuesit.
Rast i përsëritur rëndom përgjatë këtyre 5 viteve.
Degradimi dhe çorientimi total i edukimit në shkollat tona, po sjell në frekuencë të shtuar makabritete të tilla.
Më skandalozja është se përgjegjësia mbetet në emra të veçantë, duke i trajtuar rastet si devijanca individuale.
Pa mohuar ketë element, pesha më e madhe e së vërtetës qëndron tek pasiviteti dhe verbëria ministrore.
Edukimi është përmbledhur në një orë formale si dhe në futjen e gupeve që nuk kanë asnjë tagër të imponojnë modele suksesi që nuk përputhen me vlerat, virtytin, të mirën, të vërtetën e të bukurën.
Mësuesi vazhdon të konsiderohet dhe trajtohet nga ministria si një keqbërës potencial dhe është shtyrë pothuaj me përdhunë drejt bjerrjes progresive të vlerave që duhet të mbartë. Pasojat nuk po vonojnë.
Ndërsa nxënësi shihet si një “kalimtar” që pëson çdo idiotësi, qoftë kjo subjektive qoftë kjo “reformatore” ministrore (idiotësi akoma më të mëdha), brenda një sistemi që ka zhdukur keqazi çdo tabu e kufi.
Kjo e ka spostuar në shumë raste tërësisht qendrën e orbitën e orientimit të tij mësimor e psikologjik.
Sigurisht mësuesi shqiptar nuk është as ky e as rastet si ky.
Janë me mijëra të përkushtuarit, të ndershmit e të vërtetët.
Por drejtuesit politikë të shkollave tona janë shumë të ndjeshëm ndaj sjelljes politike te tyre dhe aspak vëzhgues të sjelljes së tyre në klasë.
Stimulojnë paaftësinë, servilizmin militant dhe promovojnë antivlerat e sjelljet asociale.
Nga ana tjetër, mungesa totale e vëmendjes ndaj marrëdhënieve mësues-prindër-nxënës si dhe mungesa e shërbimit psiko-social në shkolla, që mund të parandalojë me sukses çdo abuzivizëm, ka bërë që “çmenduri” të tilla të gjejnë terren e të shtohen.
Shkolla jonë duket se ka pushuar së edukuari. I ka humbur edukatori e i ka mbetur vetëm letërbërësi e transmetuesi i tekstit mësimor. Më mirë të themi:
Edukimi në shkollë ka marrë fund sepse i është goditur thelbi i funksionit të mësuesit dhe i shkollës.
Për këtë ka një përgjegjës.
Është titullari i ministrisë.
Nikolla duhet të dorëhiqet!!!!!

Luciano Boci fb

(m.k/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb