TIRANE – Që në fillim të qershorit, kur u publikua klipi “M’i dhe flakë mallit tim”, nga Bujar Qamili dhe Luana Vjollca, janë grumbulluar më shumë se 7 milionë klikime.
Produksioni dhe orkestrimi i këngës së Bujar Qamilit i kaloi pritshmëritë. Në çdo disko verore, në çdo plazh e në çdo club, “M’i dhe flakë mallit tim” është një prej këngëve që luhen më shumë në playlist-a.
Bujar Qamili ishte dje i ftuar te “Rudina” për të folur për projektet e tij të reja, planet për verën, si edhe për pasionet e tij. Siç rrëfeu ai ndër të tjera, realizimi me Luanën është pritur shumë mirë dhe ka marrë shumë klikime. Në kohën që kënga transmetohej, Bujari vazhdonte të thoshte në studio “sa e bukur është Luana”, “sa klikime ka marrë kjo këngë”.
Por ndërsa Rudina e pyeti se si është pritur nga të afërmit dhe familjarët e tij ky videoklip, këngëtari shkodran, pa e lënë manjanë humorin, tha se bashkëshortja, në fillim, kishte një problem:
“Djali, duke qenë se është muzikant, e pëlqeu dhe e vlerësoi jashtë mase, ndërsa gruaja, në fillim pati pak problem, problem me veten, në fakt…” – tha me të qeshur Bujari dhe pas pyetjes së shpejtë të Rudinës, nëse ishte bërë xheloze, ai tha: “Xheloze jo, por thoshte “mos duhet të kishit dalë pak më ndryshe, mos veshja e saj ndoshta duhet të ishte ndryshe, mos të afroheshit kaq shumë e të tjera si këto”, – vazhdoi këngëtari.
Megjithatë, nuk i zgjati shumë kjo “xhelozi”, siç rrëfeu ai pak më pas: “Tani ka ndërruar mendim, madje sa herë që e dëgjon, e pëlqen shumë.”
(BalkanWeb)
