Avionët luftarakë izraelitë nisën të hënën një seri sulmesh ajrore në një bazë ushtarake në Daraa të Sirisë jugore, duke vrarë të paktën dy persona dhe duke plagosur 19 të tjerë, njoftoi media shtetërore siriane.
Agjencia shtetërore e lajmeve SANA raportoi se të paktën pesë sulme ajrore goditën pozicionet ushtarake në Daraa, duke synuar Brigadën 132 në Distriktin e Aeroportit. Avionët izraelitë vazhduan të qarkullojnë mbi Sirinë jugore pas sulmit, theksoi ai.
Në një deklaratë të hënën, ushtria izraelite tha se filloi një seri sulmesh ajrore në Sirinë jugore, duke “goditur objektivat ushtarake” që i përkasin ushtrisë siriane.
Avionët luftarakë goditën qendrat e komandës dhe objektet ushtarake, ku, sipas deklaratës, janë ruajtur armë dhe automjete ushtarake.
“Prania e aseteve ushtarake në Sirinë jugore përbën një kërcënim për shtetin e Izraelit”, tha ushtria.
Sulmet ishin të fundit në një seri sulmesh izraelite ndaj infrastrukturës që i përkasin ushtrisë siriane.
Grupi i monitorimit të luftës, Observatori Sirian për të Drejtat e Njeriut ka dokumentuar mbi 29 sulme izraelite në territorin sirian që nga fillimi i vitit 2025, shumë prej të cilave kishin në shënjestër depo armësh të lidhura me administratën e mëparshme.
(A.A/BalkanWeb)
