TIRANË
Ministrja e Shtetit për Marrëdhënien me parlamentin ka uruar përmes një postimi në facebook, 29 vjetorin e themelimit të PS-së. Ndërsa kujton vitet e saj në këtë parti, Spiropali shkruan se sot PS është një forcë politike e pakonkurrueshme për nga vullneti për t’u korigjuar parreshtur, për t’u hapur ndaj shoqërisë për të qeverisur për të gjithë.
Postimi i plotë:
Në Partinë Socialiste të Shqipërisë kam kaluar pjesën më të madhe të jetës time të rritur. Partisë Socialiste i jam bashkuar në 2009, kur isha 26 vjeç, dhe sot nënë e dy fëmijëve jam e do jem pranë saj përgjithmonë.
Partia Socialiste më ka mësuar shumëçka në opozitë dhe në qeverisje, në të mirë dhe në të keq. Më ka sfiduar, por kurrë nuk më ka zhgënjyer. U uroj nga zemra të gjithë socialistëve dhe socialisteve gëzuar ditëlindjen e partisë sonë, që sot udhëheq betejën historike për modernizimin, transformimin dhe integrimin e shtetit dhe të kombit tonë brenda vlerave të përbashkëta të Evropës.
Gëzuar ditëlindjen e Partisë Socialiste të Shqipërisë, forcës politike që në të gjithë rrugën e saj të përpjetë ka ditur të jetë mishërim i guximit dhe suksesit në transformimin historik, por edhe mbrojtëse e patrembur e demokratizimit shoqëror dhe interesit kombëtar.
Jemi një forcë politike e pakonkurrueshme për nga vullneti për t’u korigjuar parreshtur, për t’u hapur ndaj shoqërisë për të qeverisur për të gjithë.
Respekte për themeluesit, drejtuesit, anëtarët, aktivistët, votuesit, gratë, burrat, vajzat, djemtë, të rinjtë, të moshuarit, rishtarët, veteranët, që ndër vite e rritën dhe e farkëtuan Partinë Socialiste si fuqinë e ndryshimit, duke investuar tek Ajo besimin e madh te Shqipëria që duam. Me Shqipërinë dhe për Shqipërine, suksese dhe vetëm suksese në rrugën e nisur që është fillimi i një pambarimi.
(BalkanWeb)
