BURUNDI-Tetëdhjetë e shtatë njerëz, përfshirë tetë pjesëtarë të forcave të sigurisë, u vranë gjatë sulmeve të koordinuara ndaj tre bazave ushtarake në kryeqytetin e Burundit, tha të shtunën një zëdhënës i ushtrisë së këtij vendi.

Kolonel Gaspard Baratuza tha se në sulmet e së premtes ” u vranë 79 pjesëtarë të forcave armike, 45 të tjerë u kapën dhe u konfiskuan 97 armë”. Sipas kolonel Baratuzës, tetë ushtarë dhe policë qeveritarë u vranë dhe 21 të tjerë u plagosën në përleshjet me sulmuesit.

Në një incident tjetër, të paktën 20 kufoma u gjetën sot në rrugët e kryeqytetit të Burundit, Bujumbura.

Trupat u gjetën në lagjen Nyakabiga të Bujumburas. Nuk është e qartë se cilët janë autorët e këtyre vrasjeve.

Një dëshmitar i tha agjencisë së lajmeve Associated Press se disa prej viktimave ishin me duar të lidhura pas shpine.

(d.d/BalkanWeb)