KUKËS
Presidenti i Republikës, Ilir Meta, nga qyteti i Kukësit aty ku po merr pjesë në kremtimin e 60-vjetorit të “Radio Kukësit”, u ndal tek negociatat, por edhe tek roli qe kjo radio ka luajtur në emancipimin e shqiptarëve që jetonin në Ish-Jugosllavi.
Kreu i shtetit u pyet nga gazetarët se a do ta dekorojë kryeministrin Edi Rama ashtu siç ka deklaruar më parë nëse BE vendosë të hapë negociatat me Shqipërinë, Meta u përgjigj si vijon: “Sot jemi këtu për të dekoruar Radio “Kukësin”, me Titullin e lartë “Kalorës i Urdhrit të Flamurit”, sepse e ka merituar plotësisht dhe e ka përmbushur misionin fisnik sidomos në drejtim të mbrojtjes së të drejtave të shqiptarëve në ish-Jugosllavi, duke pasur kontribute për ato arritje që ka sot Kosova dhe shqiptarët në Maqedoninë e Veriut”-tha Meta.
Sa i takon negociatave, Meta tha se akoma nuk është dhënë një vendim përfundimtar, ndaj ai iu drejtua me një thirrje vendeve skeptike të ndjekin shembullin e Bundestagut gjerman. “Po të mos humbasim shpresën, sot këtu në Kukës kemi një gëzim dhe ta çojmë gëzimin deri në fund sot”-shtoi Meta.
Prononcimi i Presidentit Meta në Kukës:
Pyetje: Mirë se erdhët për 60-vjetorin e Kukësit, por do t’ju pyesim për negociatat?
Presidenti Meta: Kam ardhur për 60-vjetorin e Radio ‘Kukësit’. Për negociatat nuk mund të flitet sot. Asgjë nuk ka përfunduar. Shpresojmë të ketë reflektim. E kam thënë edhe më përpara: Ato vendet që janë skeptike të ndjekin shembullin e Bundestagut të Gjermanisë.
Pyetje: Do ta dekoroni kryeministrin zoti President, nëse do të çelen negociatat, meqë e keni deklaruar?
Presidenti Meta: Sot jemi këtu për të dekoruar Radio “Kukësin”, me Titullin e lartë “Kalorës i Urdhrit të Flamurit”, sepse e ka merituar plotësisht dhe e ka përmbushur misionin fisnik sidomos në drejtim të mbrojtjes së të drejtave të shqiptarëve në ish-Jugosllavi, duke pasur kontribute për ato arritje që ka sot Kosova dhe shqiptarët në Maqedoninë e Veriut.
Pyetje: Nëse nuk çelen sot negociatat zoti President? Duket se ka dështim?
Presidenti Meta: Po të mos humbasim shpresën… Sot këtu në Kukës…
Pyetje: E ka fajin qeveria apo Franca?
Presidenti Meta: Sot në Kukës kemi një gëzim dhe ta çojmë gëzimin deri në fund!
