Lot gëzimi. Edhe qentë “qajnë” nga emocionet, kur ribashkohen me pronarët e tyre pas një periudhe të gjatë mungese, sipas një studimi nga universiteti kinez i ”Azabu” si dhe ai mjekësor ”Jichi”, shkruan Vanityfair.

Ekipi studioi sjelljen e 22 qenve dhe ekzaminoi reagimet e tyre. Studiuesit vendosën shirita letre nën sytë e qenve gjatë ndërveprimit normal me pronarët e tyre një minutë përpara se t’i “përqafonin” pas muajsh apo edhe pesë deri në shtatë orë pa njëri tjetrin.

Studimi evidentoi se kur kafshët panë pronarët e tyre, dhe vetëm atëherë, prodhimi i lotëve të tyre u rrit. Ata nuk “qanë” kur panë njerëz që i njihnin dhe që nuk ishin pronarë të tyre.

Studiuesit u përpoqën të kuptonin nëse ishte një reagim emocional. Për ta bërë këtë, ata aplikuan një zgjidhje për qentë që përmban oksitocinë, një hormon që luan një rol të rëndësishëm në lidhjen shpirtërore dhe zbuluan se, pas përdorimit të hormonit, lotët e qenve u rritën në mënyrë dramatike.

Lotët dihet se i ndihmojnë qentë të mbajnë të pastër kanalet e lotit, por deri më tani asnjë studim nuk i ka lidhur ato me reagimin emocional.

“Nuk kishim dëgjuar kurrë për kafshët që derdhin lot në situata të gëzueshme në takimin me pronarët e tyre”, theksoi Takefumi Kikusui, një nga autorët e studimit, të botuar në revistën Current Biology.

Nga ana tjetër, kontakti me sy dhe sytë e lëvizur të qenit kanë një efekt të fuqishëm te pronari: stimulojnë sekretimin e oksitocinës, gjë që e bën atë më të dashur ose mbrojtës ndaj shokut me katër këmbë (ashtu siç ndodh me fëmijët).

“Lotët mund të luajnë një rol të rëndësishëm në thellimin e marrëdhënieve të ndërsjella dhe forcimin e mëtejshëm të lidhjes midis specieve”, shkruajnë autorët e studimit.

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: