Kryetarja e Bashkisë së Shkodrës, Voltana Ademi ka reaguar pas video-skandalit që solli pamje nga Qendra e Zhvillimit në Shkodër ku pacientët, të sëmurë mendorë mbaheshin të lidhur me litarë e zinxhirë.

Ademi sqaron se qendra ofron shërbim rezidencial dhe ditor dhe se aktualisht trajtohen 87 persona, 40 me shërbim ditor, pjesa tjetër rezidencial, por vetëm 7 nga pacientët janë nga Shkodra.

Për Ademin, pamjet e transmetuara mbrëmë në emisionin “STOP” janë të manipuluara dhe nuk pasqyrojnë realitetin.

“Duke marrë shkas nga emisioni “STOP” i ditës së martë, datë 31 maj 2016, ndjejmë përgjegjësinë morale, institucionale e profesionale të informojmë publikun, komunitetin mbi situatën në këtë institucion. Qendra e Zhvillimit është institucion publik, që ofron shërbim rezidencial dhe ditor për personat me aftësi ndryshe. Në këtë institucion marrin shërbim persona nga e gjithë Shqipëria. Në shifra, aktualisht në këtë institucion trajtohen 87 persona; 40 persona që marrin shërbim ditor dhe 47 persona që marrin shërbim rezidencial, nga të cilët vetëm 7 janë banorë të Bashkisë së Shkodrës.
Vlerësojmë që pamjet e shfaqura mbrëmë janë pamje të rënda, të manipuluara dhe nuk pasqyrojnë realitetin në këtë qendër.
1. Ambiente të tilla nuk ekzistojnë në qendrën e zhvillimit (tuba, hekura, ganxha, etj.)
2. Imazhe të tilla janë të nxitura, të prodhuara dhe të shpërndara nga ish-përgjegjësi i sektorit social pranë qendrës së zhvillimit i larguar prej dy vitesh nga puna për thyerje të rëndë të disiplinës në punë”, shkruan Ademi në facebook.

Ajo thotë më tej se në këtë qendër zhvillimi trajtohen persona me probleme të rënda të zhvillimit fizik dhe mendor. “Këto persona janë rezident dhe marrin shërbim në këtë qendër prej më shumë se 20 vitesh, dhe pjesa më e madhe (rreth 80%) nga këto përfitues kanë kaluar moshën 25-vjeçare, moshë limit për rehabilitim dhe zhvillim”, deklaron kryetarja e Bashkisë së Shkodrës.

Ademi vlerëson personelin e qendrës për të cilin thotë se ofron shërbime të mira dhe profesionale.
“Pavarësisht problematikave dhe vështirësive të punës në këtë institucion, personeli teknik dhe kujdestar punon për të ofruar shërbime sa më të mira dhe profesionale në përputhje me nevojat specifike të klientëve. Me qëllim përmirësimin e shërbimeve dhe kushteve për klientët, vazhdimisht në qendrën e zhvillimit janë bërë ndërhyrje në infrastrukturë, është siguruar pajisja me mjete të nevojshme për ofrimin e shërbimeve rehabilituese”, thekson ajo

Sipas Ademit, aktualisht në këtë institucion me financimin e Zyrës së Bashkëpunimit të Mbrojtjes në Ambasadën Amerikane, po zhvillohet punime rikonstruktuese të përgjithshme të godinës me synim përmirësimin e kushteve dhe cilësisë së jetesës së personave që jetojnë në këtë institucion.
“Mediat janë të mirëpritura të vizitojnë ambientet e qendrës dhe të njihen drejtë për drejtë me kushtet dhe shërbimet që ofrohen në Qendrën e Zhvillimit, Shkodër”, thotë kryebashkiakja e Shkodrës.

(m.k/BalkanWeb)