Pas mbledhjes së Këshillit të Ministrave, ministri i Brendshëm Bledi Çuçi foli për mediat për sigurinë rrugore.
Gjatë fjalës së tij Çuçi tha se do të forcohen masat ndëshkuese për shkelësit rrugor.
“Kemi forcuar zyrat e inspektorëve, faza e dytë do të fokusohet tek siguria rrugore. Qëllimi ynë kryesor është që të forcojmë forcën ndëshkuese ndaj të gjithë shkelësve rrugorë. Do të marrim 110 smartpfonë që janë çift me printin përkatës dhe kur evidentohet shkelja do të evidentohet edhe gjoba. Pra nuk do të ketë mundësi negocimi mes shkelësit dhe punonjësit të policisë. Me rëndësi është që sistemi i gjenerimit të gjobës në mënyrë elektronike të funksionojë sa më mirë”, tha Çuçi.
E ndërsa u pyet për afatin 100 ditor që kryeministri Edi Rama la për Policinë së Shtetit për luftë kundër krimit, Çuçi deklaroi se drejtori i ri i Policisë së Shtetit Gledis Nano, do të ketë zhvillojë takime në të gjithë vendin për të parë situatën dhe se më pas do të ketë edhe një raport.
Pyetje: Kryeministri para pak kohësh i vendosi Policisë së Shtetit afat 100 ditor për të luftuar korrupsionin dhe tashmë jemi drejt fundit. Do të ketë një raport përfundimtar apo do të presim reformat apo platformat që do të marrë drejtori i ri?
“Drejtori i ri e ka filluar punën me këtë analizë. Ai do të jetë në të gjithë Shqipërinë, raporti do të shërbejë si një dokument i rëndësishëm për të vijuar punën në mënyrë të vazhdueshme. Padiskutim që do të ketë një raport përmbledhës lidhur edhe me këtë çështje”, tha më tej Çuçi.
I pyetur nëse do të ketë rritje pagash për punonjësit e shtetit, ai tha se Policia e Shtetit ka qenë sektori që ka përfituar më shumë.
Më tej tha se është një projekt që do të krijojë mundësi që të marrë të ardhura me shërbimet që bën në mënyrë që të shpërblejë vet trupën e saj.
(BalkanWeb)
