TIRANË – Biznesmeni Agim Rama, kunati i ish-Kryeministrit Berisha, ka deklaruar se “është e paimagjinueshme për mua”, porositja e atentateve ndaj dy deputetëve, Doshi dhe Fufi kundrejt 500 mijë eurove.

I intervistuar nëpërmjet telefonit nga gazetarja Nisida Tufa në “News 24”, Agim Rama tha: “Nuk kam pse t’i komentoj ato thënie. Nuk dua të përfshihem në këtë lloj katrahure. Me Tom Doshin, asnjëherë nuk jemi takuar, nuk njihemi as për fytyrë me njeri–tjetrin”.

Por, pas Ramës, në orën 20:50, ka reaguar Spartak Braho, kreu i Komisionit të Sigurisë. “Kunati i Berishës i devijon faktit, – ka thënë ai. – Doshi akuzoi kunatin e Berishës si pagues për atentatin.”

Ishte Kryesia e Kuvendit që “nxori në skenë” emrin e biznesmenit Agim Rama, pasi deputeti Tom Doshi akuzoi kryeparlamentarin se kishte porositur vrasjen e tij dhe të deputetit demokrat Mhill Fufi. Sipas kreut të Komisionit të Sigurisë, Spartak Braho, që lexoi deklaratën, Doshi muaj më parë kishte vënë në dijeni kreun e Kuvendit se ndaj tij ishte porositur një atentat nga kunati i ish-Kryeministrit Berisha, Agim Rama.

PYETJET DREJTUAR Z.RAMA NGA “NEWS 24”

“News 24”: Do të doja të dija komentin tuaj në lidhje me emrin që është përmendur nga ana e z.Braho dhe z.Meta për çështjen “Doshi”.

Agim Rama: Të them të drejtën, nuk kam çfarë t’i bëj ndonjë komenti kësaj thënieje të tyre. Është një gjë e paimagjinueshme për mua, kështu që nuk e meritojnë as komentin.

“News 24”: Keni qënë në dijeni më përpara për këtë?

Agim Rama: Jo

“News 24”: Po me z.Doshi, keni komunikuar?

Agim Rama: Asnjëherë nuk jemi takuar, nuk njihemi as për fytyrë me njeri – tjetrin.

“News 24”: Z.Rama, po si i gjykoni këto akuza?

Agim Rama: Jua thashë edhe njëhërë, nuk dua të prononcohem për këto gjëra. Nuk dua të përfshihem në këtë lloj katrahure. Por nuk e meritojnë as komentin nga ana ime, refuzoj dhe t’i komentoj këto veprime.

“News 24”: Do t’i drejtoheni drejtësisë?

Agim Rama: Refuzoj t’i komentoj të gjitha këto veprime.

“News 24”: Është hera e parë që e dëgjoni emrin tuaj në lidhje me këtë çështje?

Agim Rama: Unë po ju them që nuk dua të bëj komente.(Biseda mbyllet)

Agim-Rama-foto-473x443

PJESE NGA DEKLARATA E Z.SPARTAK BRAHO, DJE

“Me cilësinë e Kryetarit të Komisionit të Sigurisë Kombëtare të Kuvendit të Shqipërisë para disa muajsh më është bërë e ditur nga Kryetari i Kuvendit, z. Ilir Meta lidhur me pretendime e shprehura nga deputeti Tom Doshi se ai kishte patur informacion se po përgatitej një atentat ndaj tij dhe deputetit Mhill Fufi, pasi persona të afërt me ish-Kryeministrin Sali Berisha dhe më konkretisht kunati i tij z. Agim Rama, kishin ofruar shuma të konsiderueshme deri në 500 mijë euro për eliminimin fizik të tyre me qëllim destabilizimin politik të vendit duke synuar të fajësojnë për këtë akt Kryetarin e Kuvendit z. Meta.”

(ar.sh/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: