TIRANE
Pas miratimit sot nga Kuvendi të dekretit të Presidentit Ilir Meta për shkarkimin nga detyra e ministrit të Financave dhe Ekonomisë, Arben Ahmetaj ka një njoftim të fundit. Përmes një postimi në faqen e tij të ‘Facebook’, Ahmetaj shkruan se është gati pagesa e këstit të dhjetë për ish-të përndjekurit politikë.
Ish-ministri shprehet se mbi 123 ish të përndjekur politikë që janë ende në jetë, përfitojnë pagesën e 10-të, me një fond total prej 99,6 milionë lekë.
“Gati edhe pagesa e këstit të dhjetë për ish-të përndjekurit politikë të kategorisë parësore!
Ministria e Financave dhe Ekonomisë ka publikuar dokumentacionin e nevojshëm përkatës në mënyrë që të përfitohet kjo pagesë.
Ndërkohë vazhdojnë pagesat e këstit të tretë për trashëgimtarët, ku po trajtohen mbi 11 mijë dosje.
Vëmendja e qeverisë ndaj ish-të përndjekurve politikë, është reflektuar qartë në shifra në vitet e fundit. Përgjatë periudhës 2014-2018 janë disbursuar në favor të kategorisë parësore më shumë së katërfishi i shumës krahasuar me periudhën 2009-2013”, shkruan Ahmetaj.
(BalkanWeb)
