Detaje të reja janë zbardhur nga aksidenti i ndodhur mbrëmjen e sotme në Korçë. Gazetarja Lorena Kodra raporton për “BalkanWeb” se një kamion është përplasur me një mjet tip “Benz”, ndërsa mësohet se drejtuesi i këtij të fundit është zënë poshtë nga mjeti i tonazhit të rëndë.

Për pasojë, ka mbetur i plagosur rëndë shtetasi Koço Nasto, drejtues i Benz-it, i cili ndodhet në gjendje të rëndë shëndetësore, pasi ka marrë dëmtime të shumta në trup. Sipas gazetares Kodra, i plagosuri është pedagog i Fakultetit të Ekonomikut, në Universitetin e Korçës.

Ndërkohë, “Benz-i” i përplasur rrezikon të shpërthejë në flakë, pasi është me impiant gazi, rrjedhja e të cilit mund të shkaktojë djegien e tij. Ndërkohë, një mjet zjarrfikës ka mbërritur në vendngjarje për të ndërhyrë në rast nevoje.

  • foto galeri
  • foto galeri
  • foto galeri

Korçë
Informacion paraprak.

Më datë 16.09.2019, në aksin rrugor Korçë-Devoll, në afërsi të fshatit Kuç i Zi, janë përplasur një mjet tip kamion me drejtues shtetasin O.H, me një mjet tip “Benz” me drejtues shtetasin K.N, i cili aktualisht ndodhet në Spitalin e Korçës, nën kujdesin e mjekëve.

Grupi hetimor po kryen veprimet e mëtejshme dhe po punon zbardhjen e rrethanave të ngjarjes.

(BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb