Të tjera detaje dalin në dritë në lidhje me arrestimin mbrëmë të personit me rrezikshmëri të lartë, Nuredin Dumani i cili në momentin e kapjes u plagos me armë zjarri. Arrestimi i tij u krye në Fier, pas arratisë së tij nga Elbasani. BalkanWeb mëson se Dumani ka marrë plumb në shpatull, ndërkohë që i është nënshtruar një operacioni në spitalin e Fierit.

Gjendja e tij sipas mjekëve është e stabilizuar dhe pas ndihmës së parë ne qytetin e Fierit është transportuar për në spitalin e Traumës në Tiranë për ndihmë mjekësore. Mësohet se protokolli i ndjekur për transferimin e tij drejt Tiranës është bërë nën masa të rrepta sigurie.

Dumani besohet se ka lidhje edhe me ngjarjen që ndodhi rreth orëve të pasdites, ku në Elbasan, u gjet një mjet tip “BMW” i bërë shoshë nga plumbat.
Brenda mjetit u gjet gjithashtu 1.5 litra benzinë dhe një karikator i mbushur. Paraprakisht për këtë rast dyshohet se do të zhvillohej një krim, ndërsa është parandaluar pak para se të ndodhte. Vlen të përmendet se Dumani është një emër i njohur i drejtësisë.

Ai dyshohet për vrasjen e vëllait të Talo Çelës, Bujar Çela, si dhe katër të rinjve në Durrës. Këto ngjarje kanë ndodhur në vitin 2020.