Dritan Dervsihi mendon se Partizani ka vepruar mirë duke larguar Xhovani Kolelën dhe Elton Marinin. Në një intervistë të dhënë për “Panorama TV”, ish-drejtuesi i Partizanit, i cili është përgjegjësi i skautëve te klubi i Veronës në Serinë A, ka treguar arsyet pse sipas tij, Gazment Demi po vepron drejt me vendimin që ka marrë duke rifreskuar stafin teknik.

“Eksperienca te Verona? Tashmë jam nga më të vjetrit në klubin e Veronës, vetëm presidenti është më i vjetër se unë. Këtë javë kemi javë shumë të rëndësishme se me shumë mund arritëm të barazojmë Specian me pikë dhe të tentojmë qëndrimin në Serinë A. Shpresojmë t‘ia dalim.

Unë realisht jam me ekipin e parë, kemi një zyrë shumë të specializuar ka mbi 6 skaut që janë në xhiro në Europë dhe 3 në zyrë dhe punojmë nëpërmjet sistemit iScout dhe inteligjencës artificiale, në kërkim të lojtarëve për vitin tjetër. Por varet nga kategoria ku do jemi.

Unë jetoj çdo ditë me ekipin e parë. Për mua eksperienca në stolin e tij ishte e thjeshtë se njoh ekipin e klubin mirë. Ato dy muaj ishin edhe nga ana morale, në integrimin e djemve të rinj në klub, në atë periudhë morëm disa lojtarë të rinj. Ishte eksperiencë e re, që nuk më pëlqen. Nuk më pëlqen të bëj trajnerin, më pëlqen të bëj skautin, jo anën e trajningut.

Të dielën në 20:45 do të jetë në Rexhio Emilia ndeshja ndaj Specias, luajmë një finale të vërtetë ku pas një barazimi të mundshëm në 90 minuta, ka direkt penallti. Edhe gjyqtari është ndër më të mirët në botë, Orsato. Jemi të përgatitur dhe luhet gjithçka. Nga ana mendore jemi më mirë se ata, se vetëm pak javë më parë ata ishin 8 pikë para. Kemi ekipin e rikuperuar dhe të shohim, futbolli është i paparashikueshëm.

Ndryshimet te Partizani? Mendoj se largimi i drejtorit dhe trajnerit, përbëjnë një rinovim që ata mendojnë dhe besoj e kanë studiuar. Kush më mirë se ata e dinë çfarë trajneri e drejtori kanë pasur. Kanë pasur muaj kohë të bëjnë zgjedhje. Besoj se ata e kanë parë më mirë që të ndërrojnë drejtues e trajner.

Nuk do të thotë gjë që të fitosh kampionatin e vazhdosh automatikisht me stafin. Për mendimin tim, ata kanë parë që ka gjëra që duheshin bërë më mirë.

Largim me konsensus? Nuk besoj asnjëherë te konsensusi. Asnjë nuk e lë vendin e punës me konsensus. Të mos bëhemi njerëz mediokër kot. Ky është vendimi presidentit, është e drejtë e tij. Për mua ka bërë shumë mirë se Partizani i nuk dha gjë të re dhe nuk u afruan lojtarë cilësorë si ata që u larguan.

Të gjithë kanë një rol te suksesi, por mendoj se ky është titulli më i diskutueshëm që ka marrë Partizani në historinë e tij. Presidenti e tha që nuk ishte i kënaqur. Një klub si Partizani që humb nëntë ndeshje… Analiza është bërë më e thellë, nuk është e thënë që merr titullin, nuk duhet të konfirmohen të gjithë. Për mua ishte një kampionat që duhet të vendosej me finale.

Ta them me sinqeritet që presidenti nuk po gabon fare, se besoj se nuk ka humbur asgjë. Nuk pashë asgjë të re te Partizani. Ky më është dukur ndër kampionatet më të dobëta të Superligës, i dobët në shumë aspekte, në mënyrën e lojës, në dhunën që përdor në futboll, nuk më pëlqeu fare ky kampionat”, tha ndër të tjera Dervishi.