Policia e Elbasanit ka parandaluar një ngjarje të rende kriminale. Blutë kanë bllokuar një automjet brenda të cilit u gjetën armatime dhe lëndë djegëse, ndërsa dyshohet se do të përdoreshin në një atentat.
Burime nga BalkanWeb bëjnë me dije se automjeti u gjet dje gjatë natës në vendin e quajtur “Ish Konservimi”. Ndërkohë, gjatë kontrollit të bërë nga policia janë gjetur dy armë të llojit kallashnikov, dhjetëra fishekë, si dhe një shishe me lëndë djegëse.
Dyshohet se ky automjet po përdorej nga dy persona, të cilët mendohet të jenë vrasës me pagesë. Po ashtu BalkanWeb mëson se vendi ku u gjet automjeti, i cili po survejohej prej policisë është pranë pallatit ku jeton Erion Alibej, i cili po gjykohej si porositës i vrasjes së Emiliano Ramazanit dhe Regis Runajt. Më herët, një grup kriminal kishte planifikuar që t’i vendoste Alibejt në pallat tritol dhe të hidhej në erë banesa e tij.
HETIMET E POLICISË
Bazuar ne inteligjencën informative, se mbrëmjen e së shtunës, duke u zbardhur e diela, në Elbasan mund të ndodhte një ngjarje kriminale, shërbimet e Policisë Elbasan kanë ngritur pika kontrolli.
Si rezultat i presion të kontrolleve dhe prezencës se Policisë ne terren një drejtues mjeti ka fshehur makinën në një magazine të braktisur dhe është larguar. Ndërkohë, policia vijon hetimet për identifikimin dhe arrestimin e personave të përfshirë në ngjarje.
Njoftimi i policisë:
Elbasan
Falë inteligjencës informative, Policia parandalon një ngjarje të rëndë kriminale.
Sekuestrohen 4 armë zjarri (3 kallashnikovë dhe 1 pistoletë), 2 bidona me lëndë djegëse (benzinë) dhe një automjet që dyshohet se do të përdoreshin për kryerjen e këtij krimi.
Strukturat hetimore të Drejtorisë Vendore të Policisë Elbasan kanë marrë informacion se në orët e vona të natës së mbrëmshme mund të ndodhte një ngjarje e rëndë kriminale.
Bazuar në këtë informacion, Policia ka shtuar prezencën në terren, ka ngritur pika kontrolli dhe ka ushtruar kontrolle intensive në disa objekte të cilat dyshohet se shërbenin për fshehjen e sendeve dhe mjeteve me të cilat mund të kryheshin veprimtari kriminale.
Shërbimet e Policisë morën informacion se si pasojë e presionit të Policisë në terren, shtetasit që do të kryenin ngjarjen kriminale dyshohet se kishin fshehur automjetin që do të përdorej për kryerjen e krimit.
Në këtë kuadër, si rezultat i kontrolleve të shumta të kryera në terren, në lagjen “Emin Matraxhiu”, në zonën e quajtur “Ish-konservimi”, është gjetur një automjet tip “BMW X6”, brenda të cilit u gjetën 3 armë zjarri kallashnikov dhe 2 bidona me lëndë djegëse (benzinë).
Po në vijim të kontrolleve, në afërsi të një koshi mbeturinash, shërbimet e Policisë kanë gjetur dhe kanë sekuestruar një çantë, brenda së cilës kishte një armë zjarri pistoletë.
Në vendngjarje ndodhet një grup i posaçëm hetimor dhe ekspertë të Institutit të Policisë Shkencore, të cilët në drejtimin e Prokurorisë pranë Gjykatës së Rrethit Gjyqësor Elbasan, vijojnë punën për të bërë të mundur fiksimin e provave në vendngjarje, hapjen dhe kontrollin e automjetit.
Në Drejtorinë Vendore të Policisë Elbasan janë shoqëruar disa shtetas, dhe nën drejtimin e Prokurorisë, vijon puna për zbardhjen e këtij rasti, identifikimin dhe kapjen e autorëve.
Veprimet janë në vijim dhe në përfundim të tyre, do të ketë një informacion përfundimtar.
Policia e Elbasanit kërkon mirëkuptimin e medias që në lidhje me këtë ngjarje, për shkak të rëndësisë dhe konfidencialitetit të hetimit, me qëllim zbardhjen e plotë të ngjarjes, të mos japin informacion të pakonfirmuar, por të presin rezultatet e hetimit intensiv që po kryhet nga grupi i posaçëm hetimor, në drejtimin e Prokurorisë së Elbasanit.
(BalkanWeb)
